დედაქალაქის ყოფილ მერს ბრალი უკანონო შემოსავლების ლეგალიზაციასა და ე.წ. მარნეულის ეპიზოდთან დაკავშირებით წარედგინა. როგორც უგულავას ადვოკატმა გიზო უგლავამ ე.წ. მოდულის შენობის დატოვების შემდეგ განაცხადა, მისი დაცვის ქვეშ მყოფი თავს დამნაშავედ არ მიიჩნევს და მიაჩნია, რომ მისი დაკავება პოლიტიკური გადაწყვეტილებაა. “ყველასთვის სიურპრიზი იქნება ალბათ ის, რომ უკვე დაანონსებულ უკანონო შემოსავლების ლეგალიზაციას და ყალბ დოკუმენტს დაემატა მარნეულის ეპიზოდი, რომელშიც მას ბრალი წარედგინა ჯგუფური მოქმედების ორგანიზებისა და იძულებისთის. რა თქმა უნდა, უგულავა თავს არ სცნობს დამნაშავედ, მიიჩნევს, რომ უკანონოდაა დაკავებული. შესაბამისი მოთხოვნა უკანონოდ დაკავებულის გათავისუფლების შესახებ უკვე დავაყენეთ გამომძიებლის წინაშე. მასალების ნაწილი ახლა გადმოგვეცა, გავეცნობით და თუკი არ გათავისუფლდა, როგორც უკანონოდ დაკავებული, შესაბამისი პოზიციით წარვდგებით სასამართლოდ წინაშე”, - განაცხადა გიზო უგლავამ. ამასთან, ადვოკატი არ გამორიცხავს, რომ უგულავასთვის აღკვეთის ღონისძეიბის შეფარდებაზე სასამართლომ დღესვე იმსჯელოს. შეგახსენებთ, რომ გიგი უგულავა 3 ივლისს, აეროპორტში მაშინ დააკავეს, როდესაც ის საზღვარგარეთ მიემგზავრებოდა.