დღეს უნდა გაირკვეს, მიიღებს თუ არა წარმოებაში სააპელაციო სასამართლო გიგი უგულავას ადვოკატების სარჩელს. დაცვის მხარე საქალაქო სასამართლოს გადაწყვეტილებას ასაჩივრებს. უგულავას პროკურატურის შუადგომლობის საფუძველზე აღკვეთის ღონისძიების სახით წინასწარი პატიმრობა აქვს შეფარდებული. საჩივრის მიღების შემთხვევაში, დაცვის მხარე პროცესზე დამატებით მტკიცებულებებს წარადგენს. იმ შემთხვევაში, თუ სააპელაციო სარჩელს წარმოებაში არ მიიღებს, ან საქალაქო სასამართლოს გადაწყვეტილებას ძალაში დატოვებს, თბილისის უფლებაშეჩერებული მერის ადვოკატები არ გამორიცხავენ, რომ ადამიანის უფლებათა დაცვის ევროპულ სასამართლოსაც მიმართონ. თუ სააპელაციო სასამართლო გიგი უგულავას ადვოკატთა საჩივარს წარმოებაში მიიღებს და პროცესი ჩაინიშნება, "ნაციონალური მოძრაობა" სხდომების გასაჯაროების ინიციატივით გამოდის. მათი აზრით, საზოგადოებისათვის ცნობილი უნდა იყოს, როგორც დაცვის, ასევე ბრალდების მხარის არგუმენტები. ოპონენტთა მოთხოვნას ეხმაურებიან მმართველ გუნდშიც. "ქართულ ოცნებაში" ამბობენ, რომ დღეს ის წესები მოქმედებს, რომელიც ყოფილმა ხელისუფლებამ შემოიღო და სასამართლომ სწორედ არსებული კანონით უნდა იხელმძღვანელოს.