ევროკავშირთან ასოცირების შეთანხმება საქართველოს პარლამენტის მიერ რატიფიცირებულია.  "ევროკავშირსა და ევროპის ატომური ენერგიის გაერთიანებას და მათ წევრ სახელმწიფოებსა და საქართველოს შორის ასოცირების შესახებ" შეთანხმების რატიფიცირება 123 ხმით განხორციელდა. რატიფიცირების შემდეგ პარლამენტის სხდომათა დარბაზში ევროკავშირის ჰიმნი შესრულდა. საქართველო-ევროკავშირს შორის ხელშეკრულების ძირითადი ასპექტები დეპუტატებს საგარეო საქმეთა მინისტრმა მაია ფანჯიკიძემ გააცნო. ევროკავშირთან ღრმა და ყოვლისმომცველი ვაჭრობის მნიშვნელობაზე, ამ მიმართულებით გატარებულ და გასატარებელ ღონისძიებებზე ეკონომიკისა და მდგრადი განვითარების მინისტრმა გიორგი კვირიკაშვილმა ისაუბრა. მინისტრების შემდეგ პარლამენტის ტრიბუნა დეპუტატებმა – საპარლამენტო კომიტეტებისა და ფრაქციების წარმომადგენლებმა დაიკავეს. საქართველოს პრეზიდენტი გიორგი მარგველაშვილი ოფიციალურად მიწვეულ სტუმრებს შორის არ ყოფილა, თუმცა ის ქუთაისში საკუთარი გადაწყვეტილებით ჩავიდა და როგორც ჟურნალისტებს განუცხადა, პარლამენტის რიგგარეშე სესია მის მიერ არის მოწვეული და მისვლა შეეძლო. კენჭისყრის შემდეგ დამსწრე საზოგადოებას პარლამენტის სპიკერატიდან მიმართა პრეზიდენტმა და ასოცირების ხელშეკრულების რატიფიცირება მიულოცა. პარლამენტის სხდომას ესწრებოდა საქართველოში აკრედიტებული დიპლომატიური კორპუსი.