ბათუმში დღეს ორდღიანი საერთაშორისო საპარლამენტო კონფერენცია გაიხსნება, რომლის მიზანია საქართველოს პროგრესის შეფასება ევროკავშირთან ინტეგრაციის გზაზე ასოცირების შესახებ შეთანხმებაზე ხელის მოწერის შემდეგ. კონფერენციას გახსნიან საქართველოს პარლამენტის თავმჯდომარე დავით უსუფაშვილი, ევროკავშირის წარმომადგენლობის ხელმძღვანელი ფილიპ დიმიტროვი და გაეროს განვითარების პროგრამის (UNDP) მუდმივი წარმომადგენელი საქართველოში ნილს სკოტი. კონფერენციაზე გაიმართება მსჯელობა ისეთ საკითხებზე, როგორიცაა: საქართველოს კანონმდებლობის ევროპულ კანონმდებლობასთან ჰარმონიზაცია, ევროკავშირთან ინტეგრაციის პროცესში პარლამენტის საზედამხედველო როლი, ევროპელ პარტნიორებთან თანამშრომლობის გზები და საქართველოს მოქალაქეების ინფორმირება ევროკავშირთან ინტეგრაციის შესახებ. "კონფერენციის საერთაშორისო ფორმატი შესაძლებლობას მისცემს საქართველოს გაიზიაროს ვიშეგრადის ჯგუფის, V4, სახელმწიფოების გამოცდილება. ვიშეგრადის ჯგუფი აერთიანებს ცენტრალური ევროპის ოთხ სახელმწიფოს: პოლონეთს, ჩეხეთს, უნგრეთსა და სლოვაკეთს და მიზნად ისახავს მათი პროგრესის ხელშეწყობას როგორც ევროკავშირთან ინტეგრაციის, ასევე ურთიერთთანამშრომლობის საქმეში", - აღნიშნულია პარლამენტის მიერ გავრცელებულ ინფორმაციაში.