რუსული ჯავშანტექნიკის კოლონა უკრაინის საზღვრის მიმართულებით მიემართება. ინფორმაციას უკრაინული მედია უცხოელ ჟურნალისტებზე დაყრდნობით ავრცელებს. გავრცელებული ინფორმაციით, ადგილთან, სადაც რუსეთის "ჰუმანიტარული ავტოკოლონა" იყო გაჩერებული, სამხედრო ტექნიკის აქტიური გადაადგილება შეინიშნება. როგორც "გარდიანის" ჟურნალისტმა შონ უოკერმა "ტვიტერზე" დაწერა, მის თვალწინ რუსეთის 20-მდე ჯავშანტრანსპორტიორი და სამხედრო სატვირთოები რუსული ნომრებით, რუსეთ-უკრაინის საზღვარს მიუახლოვდნენ, რომელთაც შემდგომ უკრაინის საზღვარი გადაკვეთეს. რუსული ჯავშანტექნიკის მიერ უკრაინის საზღვრის გადაკვეთის თაობაზე განაცხადა ბრიტანული გამოცემა "ტელეგრაფის" ჟურნალისტმა როლანდ ოლიფანტმაც. "თავად გავხდი მოწმე როგორ გადაკვეთა 23-მა რუსულმა ჯავშანტექნიკამ უკრაინის საზღვარი", - დაწერა როლანდ ოლიფანტმა "ტვიტერზე". უკრაინული მედიის ბოლო ინფორმაციით, რუსეთის "ჰუმანიტარული დახმარების ავტოკოლონა", რომელსაც ოფიციალური მოსკოვის ცნობით, აღმოსავლეთ უკრაინის მცხოვრებთათვის საკვები პროდუქტები და წყალი მიაქვს, კვლავ რუსეთ-უკრაინის საზღვარის სიახლოვეს არის გაჩერებული.