"ფინანსურ სტაბილურობას არანაირი საფრთხე არ ემუქრება," - ამის შესახებ "ეროვნული ბანკის" პრეზიდენტმა გიორგი ქადაგიძემ განაცხადა. მან ლარის გაუფასურებასთან დაკავშირებით დღეს საგანგებო ბრიფინგი გამართა და პროცესის თაობაზე პირველი კომენტარი გააკეთა. მიმდინარე ვითარების შეფასებისას, ეროვნული ბანკის პრეზიდენტმა აღნიშნა, რომ ეროვნული ბანკი არის ქვეყანაში არსებული ფინანსური სტაბილურობის გარანტი და ქვეყანაში პანიკის საფუძველი არ არსებობს. "ეროვნული ვალუტის გაუფასურებას აქვს, როგორც შიდა, ასევე გარე ფაქტორები. სახეზე გვაქვს შიდა სავალუტო შემოდინებების კლება. ჩვენი გათვლებით, ეს დისბალანსი აღმოფხვრილია, პროცესები კი გამოწვეულია ბაზრის მონაწილეების აჟიოტაჟური ქცევით, რაც დამახასიათებელია ასეთ სიტუაციაში," - აცხადებს გიორგი ქადაგიძე. "ეროვნული ბანკის" პრეზიდენტი გამოსავალს ეკონომიკურ ზრდაში ხედავს და ამბობს, რომ, თუკი "დავინახავთ ნეგატიურ რისკებს, ჩვენ განვახორციელებთ მნიშვნელოვან ინტერვენციებს და გამოვიყენებთ ყველა ფინანსური ინსტრუმენტს იმისთვის, რომ სიტუაცია იყოს სტაბილური". ამასთან მან განაცხადა, რომ მთავრობისგან მიიღო პირობა, რომ დეკემბერში ბიუჯეტის დეფიციტურ ხარჯვას ადგილი არ ექნება. ეს კი იმას ნიშნავს, რომ ლარის მასა ბაზარზე არ გაიზრდება, რაც ეროვნული ვალუტის გამყარებას შეუწყობს ხელს. "ჩვენ ყოველდღიურად ვაკვირდებით და ვაანალიზებთ პროცესებს და იმ შემთხვევაში, თუკი ჩვენ დავინახავთ გაზრდილ ნეგატიურ მოლოდინს და რისკებს, ჩვენ განვახორციელებთ მნიშვნელოვან ინტერვენციებს ჩვენს ხელთ არსებული ყველა ფინანსური ინსტრუმენტის გამოყენებით," - აცხადებს ქადაგიძე.