ბიზნესმენმა ქიბარ ხალვამა საქართველოს პრეზიდენტს ტელეკომპანია "რუსთავი 2-თან" დაკავშირებით მიმდინარე სასამართლო პროცესების მონიტორინგი თხოვა. შესაბამისი კომენტარი ჟურნალისტებთან საუბარში ქიბარ ხალვაშმა პრეზიდენტ მარგველაშვილთან შეხვედრის შემდეგ გააკეთა. "ძალიან დიდი მადლობა უნდა გადავუხადო პრეზიდენტს, რომ ჩემი თხოვნა გაითვალისწინა და მიიღო. მოვუყევი ყველაფერი, რაშიც არის საქმე და ავუხსენი სამართლებრივი მხარე. ვთხოვე, რომ მონიტორინგი გაუკეთოს სასამართლოს, რადგან ის "ნაციონალური მოძრაობის" მხრიდან დიდ ზეწოლას განიცდის – არის მცდელობა, რომ "ნაციონალურმა მოძრაობამ" მოახდინოს გადაწყვეტილებაზე ზეგავლენა, აქედან გამომდინარე ვთხოვე, რომ მისი წარმომადგენელი დაესწროს სასამართლო პროცესს და გაერკვეს თუ როგორ მიდის საქმე", - თქვა ქიბარ ხალვაშმა და დასძინა, რომ პრეზიდენტმა მას დახმარება აღუთქვა. ქიბარ ხალვაში პრეზიდენტთან შეხვედრაზე ადვოკატ პაატა სალიასთან ერთად იმყოფებოდა.