ზუგდიდის რაიონულმა სასამართლომ არ დააკმაყოფილა მოქალაქე კიმ კიმ ხაის 2016 წლის 15 მარტის სარჩელი "ნასყიდობის ხელშეკრულების ბათილად ცნობის" შესახებ.

მოსამართლე მანუჩარ ცაცუამ დღევანდელ სხდომაზე მხარეებს გადაწყვეტილების სარეზოლუციო ნაწილი გააცნო, სადაც ნათქვამია, რომ: "სასამართლომ იხელმძღვანელა საქართველოს სამოქალაქო საპროცესო კოდექსის" მიხედვით და დაადგინა, რომ გაუქმდეს ზუგდიდის რაიონული სასამართლოს 2016 წლის 15 მარტის სარჩელი, რომლითაც ყადაღა დაედო მოპასუხე ემა გრიგოლიას შპს დამოუკიდებელი ტელე-რადიო კომპანია "ოდიშში" კუთვნილი 100%-დან 10%-ს."

მოსამართლემ აღნიშნა, რომ დავას ხანდაზმულობის ვადა გაუვიდა.

"ამ დავასთან დაკავშირებით ვერ გამოცხადდებოდა 5 წლიანი ხანდაზმულობის ვადა, რადგან ეს არის დავა, რომელიც გამომდინარეობს სახელშეკრულებო ურთიერთობიდან, რომლის მიმართაც სამოქალაქო კოდექსი ადგენს 3 წლიანი ხანდაზმულობის ვადას.

შესაბამისად, ეს ვადა 2010 წლიდან გასულია, ამიტომ სასამართლო მოთხოვნაზე მოსარჩელე კიმ კიმ ხაის უფლება დაეკარგა. მას ეს უფლება ჰქონდა 3 წლის განმავლობაში, თუმცა საქმე არ არის აღძრული აღნიშნულ ვადებში"- განაცხადა მოსამართლე მანუჩარ ცაცუამ.

ცნობისთვის, მოქალაქე კიმ კიმ ხაი შპს ტელე-რადიო კომპანია "ოდიშის" 10 % ითხოვდა.