ტელეკომპანია "რუსთავი 2"-ის გენერალურ დირექტორ ნიკა გვარამიაზე მომხდარ თავდასხმაზე გამოძიება დაიწყო. შს სამინისტროში აცხადებენ, რომ საქმე სისხლის სამართლის კოდექსის 126-ე მუხლითაა აღძრული, რაც ძალადობას გულისხმობს. გვარამიას ცნობით, ერთ-ერთ რესტორანში მას თავს მას შემდეგ დაესხნენ, რაც რესტორანში შუქი ჩაქრა.

"უკვე წამოსასვლელად ვემზადებოდით, რომ თავს დაგვესხნენ ჩუმად, მიპარვით, სიბნელეში. მოგვაყენეს ფიზიკური შეურაცხყოფა. მე ბოლო დღეების უძილობის და სტრესის გამო, იმდენად გაბრუებული ვარ, ვერც მოვასწარი რეაგირება და საერთოდაც ვერაფერს მივხვდი, სანამ იატაკზე არ გამოვფხიზლდი. მაშინვე გამოვიძახე პატრული. ირგვლივ კამერებია. თავდამსხმელების მაგიდაზე ყველაფერს მათი ანაბეჭდები აქვს", - აღნიშნავს დაზარალებული.

მომხდარიდან რამდენიმე საათში, ტელეკომპანიის დირექტორზე თავდასხმა ლევან გაჩეჩილაძის შვილმა, რატი გაჩეჩილაძემ აღიარა და განაცხადა, რომ ინციდენტში მარტო მონაწილეობდა. ამის შესახებ მან პოსტი სოციალურ ქსელ "ფეისბუქში" გამოაქვეყნა.

"რუსთავი 2"-ის გენერალურ დირექტორზე თავდასხმის გამო ლევან გაჩეჩილაძის შვილს ბრალი დღეს უნდა წარუდგინონ. სწორედ ამის შემდეგ გადაწყდება, როდის იმსჯელებს სასამართლო მისთვის აღკვეთის ღონისძიების შეფარდებაზე.

რატი გაჩეჩილაძე ამ დრომდე წინასწარი დაკავების იზოლატორში იმყოფება.