კოალიაცია „ქართული ოცნების“ მხარდამჭერებმა დღეს, 4 დეკემბერს დადიანების სასახლის ეზოში საპროტესტო აქცია გამართეს. აქციის მონაწილეები სამეგრელო-ზემო სვანეთის გუბერნატორის თანამდებობაზე, სამეგრელო-ზემო სვანეთის შს მთავარი სამმართველოს უფროსის, ლევან შონიას შესაძლო დანიშვნას აპროტესტებენ. აქციის მონაწილეების თქმით, ლევან შონიას სამეგრელოსთვის ფაქტობრივად არაფერი გაუკეთებია და არც არჩევნების მოგებაში მიუძღვის წვლილი. აქციის მონაწილეები, გუბერნატორის თანამდებობაზე, „ქართული ოცნების“ საარჩევნო შტაბის ზუგდიდის ოფისის ერთ-ერთ ყოფილ ხელმძღვანელს, გოგიტა მამფორიას მოაზრებენ. „ჩვენ ამ თანამდებობაზე გოგიტა მამფორიას კანდიდატურას ვუჭერთ მხარს. ის ზუგდიდიში რომ არ ჩამოსულიყო საპრეზიდენტო არჩევნებიც წაგებული გვექნებოდა. ამ ადამიანს კარგი ავტორიტეტი აქვს და საქმის გამკეთებელია".  - ამბობს მერაბ შენგელია. ამასთან, აქციის მონაწილეები აცხადებენ, რომ თუ ხელისუფლებამ მათი მოთხოვნები არ გაითვალისწინა ფართო მასშტაბიან აქციებს გამართავენ. ცნობისთვის, სამეგრელო-ზემო სვანეის გუბერნატორმა თენგიზ გუნავამ თანამდებობა მიმდინერე წლის 15 ნოემბერს დატოვა. ამჟამად გუბერნატორის უფლება-მოვალეობას ერეკლე ჯაფარიძე ასრულებს.