იუსტიციის მინისტრმა თეა წულუკიანმა დღეს, 11 დეკემბერს ზუგდიდში მშენებარე იუსტიციის სახლი დაათვალიერა. მინისტრმა ერთ-ერთი სამშენებლო კომპანიის ხელმძღვანელს მშენებლობის ვადების დარღვევასთან დაკავშირებით შენიშვნა მისცა და აღნიშნა, რომ მშენებლებს ორი კვირის დაგვიანება აქვთ. „ცუდმა ამინდმა მოუსწროთ, თუმცა არის პირობა იმისა, რომ უფრო სწრაფი ტემპით იმუშავებენ და ეს ვადები იქნება ანაზღაურებული. თუმცა ჩვენ მივდივართ იმ ტემპით, რა ტემპითაც აუცილებელია იმისთვის, რომ როდესაც გაიხსნება ეს იყოს ნამდვილი გახსნა და არა პიარისთვის. მთავარია აქ შემოსულ მოქალაქეს თუ თანამშრომელს არ ეშინოდეს იმისა, რომ რამე უბედურება მოხდება“, - განუცხადა ჟურნალისტებს თეა წულუკიანმა. სამშენებლო კომპანიის წარმომადგენლების განმარტებით, მშენებლობის ვადებთან დაკავშირებით მცირე პრობლემები იყო, თუმცა მათივე თქმით, ზუგდიდის იუსტიციის სახლის მშენებლობა ხელშეკრულებით გათვალისწინებულ ვადებში დასრულდება. თეა წულუკიანის განცხადებით, ზუგდიდის იუსტიციის სახლის გახსნა 2014 წლის პირველ ნახევარშია დაგეგმილი.