ამერიკელი მომღერალი მადონა, რომელმაც 2013 წელს 125 მილიონი დოლარი გამოიმუშავა, ჟურნალ Forbes–ის ვერსიით, მუსიკალურ ბიზნესში ყველაზე მაღალანაზღაურებადი მომღერალი ქალია. რეიტინგის მეორე პოზიციაზე განთავსდა ლედი გაგა, რომელმაც წელს 80 მილიონი დოლარი გამოიმუშავა, მესამე კი ტეილორ სვიფტია 55 მილიონი დოლარის შემოსავლით. რაც შეეხება მადონას, შემოსავლის ძირითადი ნაწილი მან მიიღო ალბომ MDNA–ს მხარდამჭერ მსოფლიო ტურნედან. დღესვე ცნობილი გახდა, რომ მომღერალი თავის 25 წლის ბოიფრენდს ბრაჰიმ ზაიბატს დაშორდა, მიზეზი კი ორივე ვარსკვლავის დატვირთული სამუშაო გრაფიკი გახდა. ლედი გაგა კი უკვე მესამე წელია, ლიდერთა სამეულშია. წელს რეიტინგის საპატიო ადგილზე ის ალბომ ARTPOP–ის გაყიდვისა და ტურნე Born This Way Ball–ის შედეგად მოხვდა. ლიდერთა ხუთეულში ასევე შევიდა ბიონსე, რომელმაც მიმდინარე წელს 53 მილიონი დოლარი გამოიმუშავა ტურ Mrs. Carter World Tour–ისა და ტანსაცმლის ხაზის House of Dereon–ის გამოშვების შედეგად. ხუთეულში ასევე შედის ჯენიფერ ლოპესი 45 მილიონი დოლარიანი შემოსავლებით. პირველ ათეულში ასევე შევიდნენ რიანა, ქეითი პერი, პინკი და სხვები. შეგახსენებთ, რომ გასულ წელს ყველაზე მაღალანაზღაურებადი ქალი მომღერლების რეიტინგის სათავეში ბრიტნი სპირსი მოექცა, რომელმაც 2012 წელს 58 მილიონი დოლარი გამოიმუშავა. Forbes–ის რეიტინგი დგება მუსიკალური ნაწარმოებების, კონცერტების ბილეთისა და შესაბამისი პროდუქციის გაყიდვების მაჩვენებლების, პრომოუტერებთან და მენეჯერებთან ინტერვიუების საფუძველზე.