მოძრაობა „სამეგრელოს ხმის“ ლიდერმა თენგიზ ჯგუშიამ დღეს,20 დეკემბერს გამართულ ბრიფინგზე ზუგდიდის მუნიციპალიტეტის გამგებლის მოადგილის მოვალეობის შემსრულებელ მერაბ ქვარაიასთან 5 თვის წინ მომხდარი შელაპარაკების დეტალებზე ისაუბრა. ჯგუშიამ აღნიშნა, რომ მის საქმეში, ფიზიკური დაპირისპირების ნაწილში პროკურატურა მზად იყო 500 ლარიანი ჯარიმის სანაცვლოდ, განრიდება განეხორციელებიანა, თუმცა ამის შესრულება ვერ მოხერხდა, რადგან ჯგუშიას თქმით, საქმეში უხეშად ერევა მერაბ ქავარიას მეუღლე, რომელიც პროკურატურაში მუშაობს. "სამეგრელოს ხმის" ლიდერმა ბრიფინგზე ასევე აღნიშნა, რომ ის და ქვარაია ყულიშკარის ტაძარში სასულიერო პირების თანდასწრებით, მეუფის კურთხევით შეხვდნენ ერთმანეთს და შერიგდნენ, თუმცა ამ ყველაფრის შემდეგ ქვარაიამ და მისმა მეუღლემ მაინც მოინდომეს მისი სამართლებრივი დასჯა. „აქედან გამომდინარე მე დასკვნები უნდა გავაკეთო. დავაკვირდები პროკურატურის პოზიციას სასამართლოზე. მირჩევნია ვიჯდე ციხეში ვიდრე ვუპასუხო ქვარაიას მოთხოვნებს და ბოდიში მოვიხადო იმისთვის, რაც არ ჩამიდენია. გამამართლებელი განაჩენის არ დადგომამდე რა თქმა უნდა მე შევაფასებ ამას პოლიტიკურ ზეწოლად, რადგან მე შევასრულე ყველა პირობა“- აღნიშნა ჯგუშიამ. მერაბ ქვარაია აღნიშნულთან დაკავშირებით კომენტარს არ აკეთებს. ცნობისთვის, ზუგდიდის მუნიციპალიტეტის გამგებლის მოადგილის მოვალეობის შემსრულებელ მერაბ ქვარაიასა და სამოქალაქო მოძრაობა “სამეგრელოს ხმის” ხელმძღვანელს თენგიზ ჯგუშიას შორის ფიზიკური და სიტყვიერი დაპირისპირება 8 აგვისტოს სოფელ რიყეში დაიწყო. სავარაუდოდ ისინი ნასვამ მდგომარეობაში იმყოფებოდნენ. მოგვიანებით, დაპირისპირება კომბინატის დასახლებაში გაგრძელდა, სადაც თენგიზ ჯგუშიამ, მოწმეების თქმით, მერაბ ქვარაიას მიმართულებით, ცეცხლსასროლი იარაღიდან ერთხელ ისროლა, დანარჩენი სამი გასროლა კი მან უმისამართოდ განახორციელა. ყოფილი პარლამენტარის ადვოკატი აცხადებს, რომ ჯგუშიამ მხოლოდ თავდაცვის მიზნით ჰაერში გაისროლა და მას ქვარაიას მისამართით არ უსვრია.