სენაკის რაიონის სოფელ ლეძაძამეს მოსახლეობას სამეგრელო-ზემო სვანეთის გუბერნატორი ლევან შონია შეხვდა. ლეძაძამეს მკვიდრის, გენადი ხუხუნის განმარტებით, გუბერნატორისგან მიიღეს პირობა, რომ სოფლის რწმუნებულად მათთვის მისაღებ პიროვნებას დანიშნავენ. „მოვიწვევთ სოფლის კრებას და რამდენიმე პიროვნებას განვიხილავთ. შერჩეულ კანდიდატებს რაიონის გამგეობას წარვუდგენთ და იქაც გაესაუბრებიან. რაც მთავარია ეს იქნება ჩვენი თანასოფლელი, რომელიც ჩვენს პრობლემებს გულთან ახლოს მიიტანს“, - ამბობს გენადი ხუხუნი. ამასთან, როგორც ლეძაძამეს სკოლის პედაგოგი მარინა ჯიმშეიშვილი ამბობს, ლევან შონია პედაგოგებს სკოლის შენობაში ცალკე შეხვედა და მათი პრობლემებიც მოისმინა. ცნობისთვის, სენაკის მუნიციპალიტეტის სოფლე ლეძაძამეს მოსახლეობა რამდენიმე დღეა საპროტესტო აქციებს მართავს. ისინი სოფლის რწმუნებულად კაპიტონ ტორჩინავას დანიშვნას აპროტესტებდნენ. აქციის მონაწილეები აცხადებდნენ, რომ ტორჩინავა მათი თანასოფლელი არ არის და ამასთან ის ნასამართლევია. თავის მხრივ ტორჩინავა აცხადებდა, რომ მას ნასამართლეობა გასული წლის 6 აგვისტოს მოუხსნეს და რწმუნებულად ყოფნის სრული უფლება აქვს.