ზუგდიდში 9 ჰექტარ მიწის ფართობზე იძულებით გადაადგილებული პირებისთვის ახალი საცხოვრებელი სახლები აშენდება- ამის შესახებ საქართველოს ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების მინისტრის მოადგილე მამუკა ცოტნიაშვილმა დღეს ზუგდიდში გამართულ შეხვედრაზე განაცხადა. ცოტნიაშვილის ინფორმაციით კორპუსების მშენებლობა ზუგდიდში ბარამიას ქუჩაზე და ინგირში იგეგმება. ამ ეტაპზე კორპუსების მშენედლობაზე ტენდერი მზადდება. მშენებლობა სავარაუდოდ 2015 წლისთვის დასრულდება და ობიექტზე დაახლოებით 2002 მდე ოჯახი ჩასახლდება. დღესვე შეხვედრაზე კერძო სექტორში მცხოვრები დევნილების საჭიროებების შესახებ დისკუსია გაიმართა. არსამთავრობო ორგანიზაცის „საუნჯეს“, ასოციაცია „სამეგრელო მედიას“ წარმომადგენლებმა და შეხვედრაზე მყოფმა 10-მდე დევნილმა ცოტნიაშვილს დევნილთა ბინათ უზრუნველყოფის პროცესებზე და კრიტერიუმებზე დაუსვა კითხვები. ცოტნიაშვილმა აღნიშნა, რომ საზოგდაოებაში არასწორი აზრი ვრცელდება თითქოს ბინების განაწილება დაპირებებით ხდება, მისი თქმით ბინების განაწილების პროცესი მხოლოდ პრიორიტეტების განსაზღვრით მიმდინარეობს. იურისტი რუსუდან პაჭკორია აცხადებს, რომ შეხვედრაზე მინისტრის მოადგილის მიერ პასუხი გაეცა მრავალ ისეთ შეკითხვას, რაც დევნილ მოსახლეობას აწუხებდა. შეხვედრა პროექტის "დევნილთა ინფორმირებულობა გრძელვადიანი საცხოვრებელი ფართით უზრუნველყოფის წესსა და კრიტერიუმებზე" ფარგლებში გაიმართა.