შესაბამისი რეკომენდაცია განათლებისა და მეცნიერების სამინისტროში დასკვნით სამუშაო შეხვედრაზე შეიმუშავეს. შეხვედრის მონაწილეების ინფორმაციით, 2014-2015 სასწავლო წელი გარდამავალი პერიოდი იქნება და სასკოლო ასაკის მქონედ მიჩნეული იქნებიან ბავშვები, რომლებსაც 6 წელი 2014 წლის 31 დეკემბრის ჩათვლით უსრულდებათ. ყოველი შემდგომი სასწავლო წლისთვის კი სასკოლო ასაკის ბავშვებად მიჩნეული იქნებიან ისინი, ვისაც 6 წელი სასწავლო წლის დაწყებამდე შეუსრულდებათ. რადიო „ათინათთან“ საუბარში ზუგდიდის საგანმანათლებლო რესურსცენტრის უფროსმა გონელი პაპავამ აღნიშნა, რომ აღნიშნული საკითხის განხილვა ამ ეტაპზე პარლამენტში მიმდინარეობს. ამასთან იგი შესაბამისი საკანონმდებლო ცვლილების ინიცირებას პოზიტიურად აფასებს და განმარტავს, რომ - „ექვსი წლის ასაკიდან ბავშვი აბსოლუტურად მზად არის ფიზიკურად, ფსიქოლოგიურად და გონებრივად იმ სასკოლო პროგრამის ასათვისებლად, რაც ეროვნული სასწავლო გეგმების მიზნებისა და ამოცანების მხრიდან არის გათვალსიწინებული, ამიტომ მე პირადად მიზანშეწონილად მიმაჩნია 6 წლის ასაკიდან მოხდეს პირველ კლასში სკოლის მოსწავლეთა ჩარიცხვა,“-აღნიშნა რადიო "ათინათთან" საუბარში პაპავამ. რესურსცენტრის უფროსი ასევე მიიჩნევს, რომ სკოლაში 5 წლის ასაკში მიღებულ ბავშვებთან პედაგოგები შემდეგ კლასებში მასალის ათვისებასთან და მოსწავლეთა ფიზიკური მონაცემებთან დაკავშირებით გარკვეულ სირთულეებს აწყდებიან.