როგორც საქართველოს კონსულმა უკრაინაში, კონსტანტინე საბიაშვილმა განუცხადა, ექსპერტიზის დასკვნაში მითითებულია, რომ ზურაბ ხურციას გარდაცვალების მიზეზი იშემიური დაავადება, გულის უკმარისობაა. "ჩვენთვის ოჯახის წევრებისგან ცნობილი იყო, რომ მას აწუხებდა დიაბეტი, გადატანილი ჰქონდა ინფარქტი და ალბათ იმ მდგომარეობამ, სადაც ის იმყოფებოდა გამოიწვია გულის შეტევა", - აღნიშნა კონსტანტინე საბიაშვილმა. მისივე ინფორმაციით, საელჩომ გარდაცვლილის გადასასვენებლად საჭირო პროცედურები უკვე მოამზადა და ახლა ოჯახის გადაწყვეტილებას ელოდება. "ველოდებით ოჯახის წინადადებას, როდის უნდა მოხდეს მიცვალებულის გადასვენება. ყველაფერი გამზადებულია. დამკრძალავი ბიურო, რომელიც ახორციელებს აეროპორტში მიცვალებულის ტრანსპორტირებას ელოდება ოჯახის ნებართვას. ჩვენ მზად ვართ ეს გავაკეთოთ ოჯახის პირველივე ზარის შემდეგ", - აღნიშნა კონსულმა. ზურაბ ხურცია კიევში 18 თებერვალს გარდაიცვალა.