საჯარო სკოლის დირექტორებს პარტიის ბიუროში გაწევრიანებით კანონი არ დაურღვევიათ. ამის შესახებ რადიო „ათინათს“ „ საერთაშორისო გამჭვირვალობა- საქართველოს“ ზუგდიდის ოფისის კოორდინატორმა მალხაზ ჭკადუამ განუცხადა. მისი განმარტებით, მათ აქვთ კონსტიტუციური უფლება იყვნენ ამა თუ იმ პარტიის წევრები. ამასთან ჭკადუა აცხადებს, რომ სკოლის დირექტორები არ არიან საჯარო მოხელეები და მათზე არ მოქმედებს ის შეზღუდვები, რომლებიც კანონით ვრცელდება საჯარო მოხელეებზე. „რომც იყვნენ საჯარო მოხელეები, მათ ვერავინ დაუშლის, იყვნენ ამა თუ იმ პარტიის წევრები. რაც შეეხება პოლიტიზირების საფრთხეს შეიძლება ვიღაცამ თქვას, რომ არსებობს და ვიღაცამ არა. იმ შემთხვევაში თუ დირექტორებმა პოლიტიკური აქტივობა განახორციელეს სკოლებში, პირველ რიგში ხმა უნდა ამოიღოს სკოლის სამეურვეო საბჭომ. ასევე, ამისთვის არსებობს მედია და არასამთავრობოები“, - აცხადებს მალხაზ ჭკადუა. შეგახსენებთ, რომ სამოქალაქო მოძრაობა „სამეგრელოს ხმის“ ლიდერი თენგიზ ჯგუშია ზუგდიდის #4 საჯარო სკოლის დირექტორის ნათია ხუფაცარიას და ფრანგული სკოლა-ლიცეუმის დირექტორის კახაბერ ფარცვანიას მიერ კოალიცია „ქართული ოცნების“ ადგილობრივი ორგანიზაციის მთავარ ბიუროში გაწევრიანებას გამოეხმაურა. მისი თქმით, სკოლის დირექტორების ყოფნა პარტიის ბიუროს შემადგენლობაში „არის კონსტიტუციის სერიოზული გადაცდომა და ღალატი მასწავლებლის მოწოდების“. „სამეგრელოს ხმის“ ლიდერმა სკოლის დირექტორებს ბიუროს დატოვებისკენ მოუწოდა. თავის მხრივ, სკოლის დირექტორები აცხადბენ, რომ მათ პარტიაში გაწევრიანების სრული უფლება აქვთ და ამით ისინი არც კონსტიტუციას არღვევენ და არც კანონს ზოგადი განათლების შესახებ.