სენაკში, არასამთავრობო ორგანიზაცია “ქალთა კავშირი – ქალები მშვიდობისთვის“ ლიდერი და „ქართული ოცნების“ აქტიური მხარდამჭერი ინგა ქარდავა, „ნაციონალურ მოძრაობაში“ გადავიდა. ქარდავას თქმით, იგი სენაკის საკრებულოს წევრობისთვის „ნაციონალური მოძრაობის“ პარტიული სიით იბრძოლებს. „სენაკში „ქართული ოცნება“ იმ ხალხით გაივსო, რომლებსაც 2012 წლის არჩევნებამდე ვებრძოდით. გურამ მისაბიშვილი და ხვიჩა ჯიშკარიანი მთელი კლანით გადაბარგდნენ „ოცნებაში“. ეს ხალხი იმ ცხრა წლის განმავლობაში დაგროვილი ქონების დასაცავად იბრძვის. მე ამ ხალხს ვებრძოდი და მათ გვერდით არ ვაპირებ დგომას! „ნაციონალურ მოძრაობაში“ დარჩნენ ღირსეული ადამიანები, რომლებთან მუშაობა ჩემთვის დიდი პატივია“ , -ამბობს ინგა ქარდავა. სამეგრელო-ზემო სვანეთის გუბერნატორის ერთ-ერთმა მოადგილემ, ხვიჩა ჯიშკარიანმა, ინგა ქარდავას „ნაციონალურ მოძრაობაში“ გადასვლასთან და მის მიმართ გამოთქმულ ბრალდებებთან დაკავშირებით მოკლე კომენტარი გააკეთა: „მე ჩემს თავს დიდ პატივს ვცემ და იმ ქალბატონის განცხადებებზე კომენტარს არ გავაკეთებ“, - აცხადებს ხვიჩა ჯიშკარიანი. სენაკის გამგებლის მოვალეობის შემსრულებელი და „ქართული ოცნების“ რაიონული ორგანიზაციის თავმჯდომარე გოჩა დგებუაძე ინგა ქარდავას გადაწყვეტილებას არალოგიკურს უწოდებს. „როგორ შეიძლება იქ გადახვიდე, საიდანაც მოსულ ხალხს აკრიტიკებ. ის ყოველთვის იქ იყო სადაც წავიდა, ახლა უბრალოდ ლუსტრაცია გაუკეთა თავის თავს,“-აცხადებს გოჩა დგეუბუაძე.