„არასაპარლამენტო ოპოზიციისა“ და „სახალხო პარტიის“ ზუგდიდის წარმომადგენლები ადგილობრივი ტელევიზია „ოდიშის“ არხზე  დებატებს ითხოვენ. ისინი ტელედებატებში „ქართული ოცნებისა“ და „ნაციონალური მოძრაობის“, თვითმმართველობის არჩევნებში მონაწილე, კანდიდატებს იწვევენ. „სახალხო პარტიის“ ზუგდიდის რაიონის გამგებლობის კანდიდატი ვახუშტი ფარცვანია აცხადებს, რომ როგორც მმართველი პარტიის, ასევე, „ნაციონალური მოძრაობის“ წარმომადგენლების წინასაარჩევნო  ქმედებები მათთვის მიუღებელია. მისივე თქმით, მთავრობა დემოკრატიული არჩევნების ჩატარებას ვერ ახერხებს და  სამეგრელოს რეგიონში ამომრჩევლების მოტყუება კვლავ გრძელდება. „აქედან გამომდინარე, მოსახლეობასთან ერთად, ვითხოვთ გაიმართოს დებატები ადგილობრივ ტელევიზიაში, რათა "გაშიშვლდეს" ყველა კანდიდატი და მოქალაქეებს მიეცეთ თავისუფალი აჩევანის უფლება“,- განაცხადა ვახუშტი ფარცვანიამ დღეს გამართულ საგანგებო ბრიფინგზე. „არასაპარლამენტო ოპოზიციის“ ზუგდიდის მუნიციპალიტეტის საკრებულოს პარტიული სიის პირველი ნომერი, ბეჟან გუნავა აცხადებს, რომ „სააკაშვილის რეჟიმის“ დამარცხების შემდეგ „ქართული ოცნების“ ადილობრივი ხელისუფლების წარმომადგენლებმა ხალხის იმედები ვერ გაამართლეს და სოფლებში კვლავ უამრავი პრობლემაა. „ჩვენ გვაქვს ბუნებრივი სურვილი პირდაპირ ეთერში დაველაპარაკოთ  „ქართული ოცნების“ კანდიდატებს და ასევე, „ნაციონალური მოძრაობის“ წარმომადგენლებს. ხალხს, კინკლაობას ურჩევნია კონკრეტული საქმის კეთება და ინიციატივები, რომლებიც ჩვენ მრავლად გაგვაჩნია“, - აცხადებს ბეჟან გუნავა. ტელეკონპანია „ოდიშის“ საინფორმაციოს რედაქტორის ნანა ქობალიას თქმით, ისინი მზად არიან, ფორმატის შესაბამისად, ნებისმიერი პარტიის კანდიდატებს ღია ეთერი დაუთმონ. „ჩვენ ტექნიკურად არ გვაქვს იმის საშუალება, რომ ღია ეთერში ექვსივე კანდიდატი ერთად დავსვათ. თუ „ქართული ოცნება“ და „ნაციონალური მოძრაობა“ მოისურვებს ცალ-ცალკე დაჯდნენ ამ პარტიებთან, ჩვენ დებატების ჩასატარებლად მზად ვართ. ზემოაღნიშნული პარტიების წარმომადგნლების გამოწვევას, ტელედებატების შესახებ, „ნაციონალური მოძრაობის“ წარმომადგენლები იღებენ და აცხადებენ ,რომ ისინი დებატებისთვის მზად არიან. მართველი პარტიის საარჩევნო შტაბში აცხადბენ, რომ ტელეკომპანია „ოდიშის“ არხზე, მათმა კანდიდატებმა მონაწილეობა ერთხელ უკვე მიიღეს და ამის სურვილი ხელმეორედ არ გააჩნიათ.