პატიმრობიდან გათავისუფლების სანაცვლოდ დათა ახალაიას გირაოს სახით 100 ათასი ევროს გადახდა მოუწევს
დათა ახალაიას საბერძნეთიდან საქართველოში ექსტრადირების საკითხთან დაკავშირებით საქართველოს მთავარი პროკურატურა განცხადებას ავრცელებს.
მასში აღნიშნულია, რომ გუშინ საბერძნეთის რესპუბლიკის პატრას სააპელაციო სასამართლოში ჩატარდა საქართველოს სამართალდამცავი ორგანოების მიერ ძებნილი დავით ახალაიას საქართველოში ექსტრადიციის საკითხის არსებითი განხილვის მორიგი სხდომა.
სასამართლოს გადაწყვეტილებით, პატრას პროკურატურას დაევალა საქართველოს კომპეტენტური ორგანოებიდან დამატებითი ინფორმაციის გამოთხოვა, რაც უზრუნველყოფილ იქნება საქართველოს მთავარი პროკურატურის მიერ საბერძნეთის მხარის მიერ დამატებითი ინფორმაციის მოთხოვნის შესახებ შესაბამისი დოკუმენტის მიღების შემდეგ.
ამასთან, სასამართლომ მიიღო გადაწყვეტილება დავით ახალაიას მიმართ გამოყენებული საექსტრადიციო პატიმრობის გირაოთი შეცვლის შესახებ. გირაოს თანხად განისაზღვრა 100 000 ევრო. გარდა ამისა, დავით ახალაიას აეკრძალა საბერძნეთის რესპუბლიკის ტერიტორიის დატოვება და დაეკისრა ვალდებულება კვირაში ერთხელ გამოცხადდეს შესაბამის პოლიციის ორგანოში, სანამ საბერძნეთის სასამართლო მიიღებს გადაწყვეტილებას დავით ახალაიას ექსტრადიციის შესახებ.
,,გვსურს აღვნიშნოთ, რომ დავით ახალაიას საქართველოში ექსტრადიციის შესახებ გადაწყვეტილება საბერძნეთის რესპუბლიკის პატრას სააპელაციო სასამართლოს არ მიუღია. საქართველოს მთავარი პროკურატურის შუამდგომლობის საფუძველზე ექსტრადიციის საკითხის განხილვა გაგრძელდება საბერძნეთის მხარისთვის დამატებითი ინფორმაციის მიწოდების შემდეგ“ ,_ აღნიშნულია პროკურატურის განცხადდებაში.
მასალის გამოყენების პირობები