ფოთის მერიის ადმინისტრაციული შენობის გვერდით, პატიმრის გურამ ლაშქარავას ოჯახის წევრებსა და და ახლობლებს კარავი აქვთ გაშლილი და პროტესტის უკიდურეს ფორმას მიმართავენ. უკვე რამდენიმე დღეა 6 ადამიანი შიმშილობს. აქციის მონაწილეები ზუგდიდის სასამართლოს 23 მაისის განაჩენს აპროტესტებენ, რომლის მიხედვითაც, იარაღის ტარებისა და ნარკოტიკების შენახვა-მოხმარებისთვის ბრალდებულ გურამ ლაშქარავას სისხლის სამართლის კოდექსის 260-ე და 236-ე მუხლებით 8 წლით თავისუფლების აღკვეთა მიესაჯა. აქციის მონაწილეები ფოთის მაჟორიტარ დეპუტატს ეკა ბესელიას შეხვდნენ. "ქალბატონმა ეკამ ჩვენ კონკრეტული პასუხი ვერ მოგვცა, ვთხოვთ მას როგორც პარლამენტის ადამიანის უფლებების დაცვის კომიტეტის თავმჯდომარეს რომ დახმარება გაგვიწიოს. მიგვაჩნია, რომ გურამ ლაშქარავა უკანონო პატიმარია", - აცხადებს დაკავებულის მეუღლე ირმა კუჭავა. როგორც ოჯახის წევრები აცხადებენ, მაჟორიტარი დეპუტატი მათ მხოლოდ საქმის გადახედვას დაპირდა, თუმცა აქციის მონაწილეები პროტესტის შეწყვეტას არ აპირებენ. მათი განცხადებით, შიმშილობას მანამ გააგრძელებენ, სანამ შესაბამისი უწყებები დროულ რეაგირებას არ მოახდენენ. "აქციის რამდენიმე მონაწილის ჯანმრთელობის მდგომარეობა დამძიმდა, მათთვის სასწრაფო სამედიცინო დახმარების გამოძახებაც კი გახდა საჭირო, ვიმედოვნებთ, რომ ხელისუფლება პროტესტის უკიდურეს ზომაზე დროულ რეაგირებას მოახდენს", - აცხადებს გურამ ლაშქარავას ადვოკატი ზაურ კინტირაია. ოჯახის წევრები მიიჩნევენ, რომ ლაშქარავა უკანონო პატიმარია და საქმის ხელახალ გამოძიებას ითხოვენ.