ზუგდიდში, "ნაციონალური მოძრაობის" ოფისთან  დაპირისპირება  დღეს უკვე მეორედ მოხდა. თავდაცვის სამინისტროს დაზვერვის ოფიცრის, პაატა ქარდავას ახლობლების გამოჩენა “ნაციონალების“ოფისთან ამჯერად ფიზიკურ დაპირისპირებაში გადაიზარდა, ნაციონალების ოფისს ქვები და წყლით სავსე ბოთლი დაუშინეს. ქარდავას ახლობლებთან ერთად აქციაზე კოალიცია „ქართული ოცნების“ ზუგდიდის ორგანიზაციის ახალგაზრდული ფრთის წარმომადგენლებიც იმყოფებოდნენ. აქციის წევრებმა რამდენჯერმე სცადეს ოფისში შეჭრა, "ნაციონალური მოძრაობის" გამგებლობის კანდიდატს დაპირისპირების დროს სახეში მუშტი მოხვდა. ფიზიკური დაზიანება მიიღო ასევე  "ნაციონალური მოძრაობის" წარმომადგენელმა ქრისტინე მაქაცარიამ. აქციის წევრები  მოითხოვდნენ, რომ “ერთიანმა ნაციონალურმა მოძრაობამ” და თენგიზ გუნავამ უარი თქვან ზუგდიდში არჩევნებში მონაწილეობაზე. პოლიციის სამმართველოს თანამშრომლებმა  სიტუაციის განმუხტვა დაახლოებით საათნახევრის შემდეგ შეძლეს. ამ დროისთვს გამსახურდიას ქუჩაზე საავტომობილო მოძრაობა აღდგენილია. აქციის ერთ-ერთი მონაწილე, საქართველოს  ფოსტის თანამშრომელი ალექსანდრე მოლაშხია დაკავებულია. შინაგან საქმეთა სამინისტრომ გუშინ გაავრცელა ინფორმაცია, სადაც ნათქვამია, რომ თავდაცვის სამინისტროს დაზვერვის ოფიცერი პაატა ქარდავა მოკლულია. საქართველოს პრემიერმინიტრის განცხადებით, შესაძლოა მკვლელობასთან თენგიზ გუნავასაც ჰქონდეს კავშირი.