დღეს, ზუგდიდის მუნიციპალიტეტის გამგეობის საკონფერენციო დარბაზში ზუგდიდის მუნიციპალიტეტის გამგებლის მოვალეობის დროებით შემსრულებელმა გიზო სართანიამ, კულტურის მინისტრის მოადგილემ მანანა ბერიკაშვილმა, ბიზნესმენმა დავით ბერძენიშვილმა და კორეულმა კომპანია ,,TDA"–მ ზუგდიდის შალვა დადიანის სახელობის დრამატული თეატრის რეკონსტრუქციაზე იმსჯელეს. ამის შესახებ ინფორმაციას ზუგდიდის გამგეობის ვებ გვერდი ავრცელებს. მათივე ცნობით, კომპანიამ წარმოადგინა მის მიერ რესტავრირებული ტოკიოს, მოსკოვის, სხვადასხვა ქვეყნების დიდი თეატრებისა და ფილარმონიების რეკონტრუქციის ამსახველი ვიდეო რგოლები. როგორც ბიზნესმენი დავით ბერძენიშვილი ამბობს, შალვა დადიანის სახელობის თეატრის რეკონსტრუქციისთვის,  დაახლოებით, 10–დან 20 მილიონ ლარამდე გაიხარჯება. მათივე ცნობით,  პროექტი სამი თვის მანძილზე მომზადდება.