დღეს, ზუგდიდის მუნიციპალიტეტის საკრებულოს თავმჯდომარემ ლევან კონჯარიამ, ზუგდიდის საფეხბურთო კლუბთან დაკავშირებით საგანგებო განცხადება გააკეთა. მისი განცხადებით მმართველი პარტიის წარმომადგენლები საფეხბურთო კლუბ „ზუგდიდის“ გულშემატკივრებს ცრუ დაპირებებს აძლევენ. „იძლევიან დაპირებებს, რომ გუნდს დავაბრუნებთ უმაღლეს ლიგაში, სტადიონს ვაშენებთო. გუნდის ლიგაში დაბრუნება არის მხოლოდ ფეხბურთის ფედერაციის საქმე და არავითარ შემთხვევაში რომელიმე პარტიის“, - აცხადებს კონჯარია. ზუგდიდის საკრებულოს თავმჯდომარემ „ზუგდიდის“ ყოფილ მწვრთნელზე ოთარ გაბელიაზეც ისაუბრა და აღნიშნა, რომ გაბელია კლუბიდან იმიტომ წავიდა, რომ მას ხელფასის სახით 2000 ლარზე მეტი არ გადაუხადეს. „ოთარ გაბელია ჩვენ არ მოგვიხსნია. მას კლუბის მაშინდელმა ხელმძღვანელმა მალხაზ ჭეჟიამ 2000 ლარზე მეტი არ გადაუხადა და როგორც გვაქვს ინფორმაცია მან კლუბი დატოვა“, - აღნიშნა ლევან კონჯარიამ. „ქართული ოცნების“ საარჩევნო შტაბში აცხადებენ, რომ ამომრჩევლებისთვის ს/კ „ზუგდიდის“ უმაღლეს ლიგაში დაბრუნების დაპირება აბსურდია. „ფეხბურთის გულშემატკივებმა და ვისაც ფეხბურთი აინტერესებს ყველამ ძალიან კარგად იცის, რომ კლუბის უმაღლეს ლიგაში დარჩენა არ დარჩენის საკითხი მხოლოდ ფედერაციის გადასაწყვეტია. ასევე, მინდა ავღნიშნო, რომ, როგორც მე მაქვს ინფორმაცია, „ზუგდიდი“ ლიგაში რჩება, რადგან უმაღლესი ლიგა 16 გუნდიანი გახდება“, - აღნიშნა „ქართული ოცნების“ საარჩევნო შტაბის პრესასთან ურთიერთობის სამსახურმა მერი შენგელაიამ. საფეხბურთო კლუბ „ზუგდიდის“ ყოფილი ხელმძღვანელი მალხაზ ჭეჟია ამბობს, რომ გუნდს ფინანსური პრობლემები ჰქონდა და მწვრთნელს 3000 ლარზე მეტს ვერ გადაუხდიდნენ. „ჩვენ ოთარ გაბელიას შევთავაზეთ 3000 ლარი და არა 2000 ლარი, როგორც კონჯარია ამბობს. ოთარ გაბელია ითხოვდა 5000 ათასს და ამის საშუალება გუნდს ნამდვილად არ ჰქონდა“,-განაცხადა მალხაზ ჭეჟიამ.