ზუგდიდში მასწავლებლის სახლის მშენებლობა დაიწყება, რომელიც სამეგრელო-ზემო სვანეთის რეგიონის პედაგოგებს სხვადასხვა მიმართულებით მოემსახურება. აღსანიშნავია,რომ ტერიტორია,სადაც მშენებლობა დაიწყება,საქართველოს განათლებისა და მეცნიერების მინისტრმა თამარ სანიკიძემ ზუგდიდელ პედაგოგებთან ერთად დაათვალიერა და პირადად გაეცნო საპროექტო სამუშაოებს. მინისტრის განცხადებით, მასწავლებლის სახლის ამოქმედება რეგიონისათვის ძალიან მნიშვნელოვანია, რადგან ადგილობრივი მასწავლებლებისა და დირექტორებისთვის მოკლე და გრძელვადიანი ტრენინგები პროფესიულ უნარებსა და ყველა სასკოლო საგანში ადგილზე განხორციელდება. გარდა ამისა, მისი განმარტებით, მოეწყობა სემინარები, კონფერენციები, კვალიფიკაციის ასამაღლებელი კურსები ინგლისურ ენაში, კომპიუტერსა და მენეჯმენტში. განათლების სამინისტროს ინფორმაციით, სკოლის პედაგოგები და დირექტორები მასწავლებლის სახლში ფინანსურ და იურიდიულ კონსულტაციებსაც მიიღებენ. "უცხოელი და ქართველი ტრენერები სხვადასხვა საგნებში სამოდელო გაკვეთილებსა და მასტერკლასებს ჩაატარებენ განხორციელდება ლაივ კონფერენციები საქართველოს სხვადასხვა რეგიონში განთავსებულ სკოლებთან, მოეწყობა ბიბლიოთეკაც, რომელშიც ყველა სახის წიგნი განთავსდება, მათ შორის სახელმძღვანელოები, რომლებიც მასწავლებლებსა და დირექტორებს პროფესიული უნარების გაუმჯობესებაში დაეხმარება", - აცხადებენ სამინისტროში. ამასთან, უწყების ცნობით, 2014 წელს სამეგრელოში დაგეგმილია 54 საჯარო სკოლის რეაბილიტაცია, 2 სკოლის ავარიულობის დადგენა და შესაბამისი ღონისძიებების დაგეგმვა, 6 სკოლის გაზიფიკაცია. "მესხიას სახელობის უნივერსიტეტის სენაკის პროფესიული სასწავლებლის სრული რეაბილიტაცია, სველი წერტილების მოწესრიგება, მესაქონლეობის ფერმის მშენებლობა და სასწავლებლის გაზიფიკაცია. ასევე, ამავე სასწავებლის სტუდენტთა საერთო საცხოვრებელის რეაბილიტაცია (პროფესორებთან შეხვედრაზე პროფესიული სასწავლებლის პედაგოგებიც იქნებიან). მესხიას სახელობის უნივერსიტეტის გადახურვა და სტუდენტთა საერთო საცხოვრებლის რეაბილიტაცია", - განმარტავენ უწყებაში.