ზუგდიდის რაიონულ სასამართლოში ლევან დარასელიას საქმეზე დღეს, 20 ივნისს,ბრალდების მხარის ორი მოწმე დაიკითხა. დარასელიას პროკურატურა ტოტალიზატორის თანამშრომლის, რობერტ გაბისონიას ცემას და გაძარცვას ედავება. დღეს დაკითხულმა მოწმეებმა ხვიჩა ახალაიამ და როლანდ კაკულიამ, დარასელიას საქმეზე მათთვის ცნობილი დეტალები სასამართლოს გააცნეს. ორივე მათგანმა ინციდენტის შესახებ ბრალდებულისგან შეიტყო. დარასელიას საქმეზე სასამართლო გადაწყვეტილება სავარაუდოდ, 23 ივნისს ჩანიშნულ პროცესზე გახდება ცნობილი. საქმეზე უკვე დაიკითხნენ ბრალდებული ლევან დარასელია და დაზარალებულად მიჩნეული რობერტ გაბისონია.დარასელიამ მოსამართლეს განუცხადა,რომ გაბისონიამ შელაპარაკების დროს მისი მისამართით ცეცხლსასროლი იარაღიდან 3-ჯერ გაისროლა, რის გამოც მან იგი რამდენიმე დღეში სცემა. დარსელია გაბისონიას გაძარცვის ფაქტს უარჰყოფს. მისივე თქმით მას ემუქრებოდნენ, რომ თუ სროლის ფაქტზე რამეს იტყოდა ნარკოტიკს ჩაუდებდნენ. დაზარალებულად მიჩნეული კი აცხადებს, რომ დარასელიამ მასზე თავდასხმა უცნობ პირთან ერთად განახორციელა,მას ფიზიკური შეურაცყოფა მიაყენა და 30 ლარის ოდენობის თანხა ამოაცალა. შეგახსენებთ, რომ ბრალდების მხარე დარასელიას დაზარალებულისთვის აღნიშნული თანხის წართმევას და სხვა პირთან ერთად მის ცემას ედავება. ლევან დარსელიას ბრალი სისიხლის სამართლის 178-ე მუხლის მესამე ნაწილის „ა“ და „ბ“ ქვეპუნქტებით ედება,რაც ჯგუფურ ძარცვას გულისხმობს და ბრალის დამტკიცების შემთხვევაში ბრალდებულს 5–დან 8 წლამდე თავისუფლების აღკვეთა ემუქრება