ანაკლიის #32 საარჩევნო უბანზე მომხდარ ინციდენტში მონაწილე „ქართული ოცნების“ საარჩევნიო შტაბის უფროსის მოადგილის, ვალიკო აბსანძეს წინააღმდეგ საქმე სისხლის სამართლის 239-ე მუხლის პირველი ნაწილით არის  აღძრული და მიმდინარეობს გამოძიება. ამის შესახებ ჟურნალისტებს აბსანძის ადვოკატმა დემურ სოტკილავამ განუცხადა. თუმცა, ადვოკატი არ გამორიცხავს, რომ აბსანძეს ბრალი დაუმძიმდეს. "ჩემი დაცვის ქვეშ მყოფმა რამდენჯერმე მოახდინა ჰაერში გასროლა. ჩასატარებელია ექსპერტიზა. აბსანძე ცნობს თავს დამნაშავედ და აღიარებს, რომ მან ჰაერში გამარჯვების აღსანიშნავად რამდენჯერმე გაისროლა“, - ამბობს დემურ სოტიკილავა. მისივე განმარტებით, აბსანძეს, ამ ეტაპისთვის, წარდგენილი ბრალდებით სამ წლამდე თავისუფლების აღკვეთა ემუქრება. ანაკლიაში, სადაც  განმეორებითი არჩევნები მიმდინარეობდა, კენჭისყრის დასრულების შემდეგ ინციდენტი მოხდა. თვითმხილველების ინფორმაციით,  ”ქართული ოცნების” აქტივისტები არჩევნებში ელგუჯა ესართიას გამარჯვებას ზეიმობდნენ, რა დროსაც ერთ-ერთმა მათგანმა, ვალიკო აბსანძემ ცეცხალსასროლი იარაღიდან ჰაერში ისროლა, რამაც  ”ნაციონალური მოძრაობის” მხარდამჭერების უკმაყოფილება გამოიწვია და სიტყვიერი დაპირისპირება მალევე ფიზიკურში გადაიზარდა. სამართალდამცავებმა აბსანძე და მასთან ერთად მყოფი კიდევ ერთი პირი დააკავეს.