აფხაზეთში გასამართ არჩევნებს აფასებს ქართული მხარე. გია ვოლსკი აცხადებს, რომ ნებისმიერ ოკუპირებულ ტერიტორიაზე არჩევნები დემოკრატიულად არ ჩაითვლება. იგივე მოსაზრებას გამოთქვამს საგარეო საქმეთა მინისტრი მაია ფანჯიკიძე. მისი განცხადებით, ოკუპირებულ ტერიტორიაზე ჩატარებულ არჩევნებში მოსახლეობა ვერ მოახდენს საკუთარი აზრის დაფიქსირებას. ოკუპირებულ აფხაზეთში კი ე.წ. ვადამდელი საპრეზიდენტო არჩევნებისთვის მზადება მიმდინარეობს. ე.წ. ცენტრალურ საარჩევნო კომისიაში დარეგისტრირდა რაულ ხაჯიმბას პარტია. თვითგამოცხადებული რესპუბლიკის ე.წ. კონსტიტუციის მიხედვით, იმ შემთხვევაში, თუკი პარტია ოფიციალურად არაა დარეგისტრირებული, კანდიდატს საპრეზიდენტო არჩევნებზე ვერ წარადგენს. სავარაუდოდ, დღეს განიხილავენ პარტიაში ეგრეთ წოდებული პრეზიდენტობის კანდიდატის ვინაობასაც. ოკუპირებულ აფხაზეთში ვადამდელი საპრეზიდენტო არჩევნები 24 აგვისტოსაა დაგეგმილი. დღესვე გაავრცელა განცხადება ეგრეთ წოდებულმა შინაგან საქმეთა მინისტრმა. ალექსეი ლომიას თქმით, პროცესში მონაწილეობას ვერ მიიღებს 23 ათასი ადამიანი, რომლებსაც, ლომიას თქმით, თვითგამოცხადებული რესპუბლიკის პასპორტები უკანონოდ გადაეცათ.