ზუგდიდის მუნიციპალიტეტის 2014 წლის ბიუჯეტი, რომელიც მუნიციპალიტეტის გაყოფის შედეგად მომზადდა, დღეს გამართულ სხდომაზე დამტკიცდა. ბიუჯეტის დამტკიცებას 33 დეპუტატიდან 25-მა დაუჭირა მხარი, 7-მა თავი შეიკავა, ხოლო ერთი დეპუტატი -"ნაციონალური მოძრაობიდან" - კახა ჩანგელია წარმოდგენილი ბიუჯეტის წინაღმდეგ წავიდა. ზუგდიდის გამგეობის საფინანსო სამსახურის უფროსის ნანი მიქენაიას განცხადებით, ზუგდიდის მუნიციპალიტეტის ბიუჯეტის მოცულობა წლის ბოლომდე დარჩენილი პერიოდისათვის 8 მილიონ 209 ათასი ლარით განისაზღვრა.  ხოლო წლიურმა მოცულობამ 16 მილიონ 736 ათასი ლარი შეადგინა. მისივე განმარტებით, ყოფილი ზუგდიდის მუნიციპალიტეტის ბიუჯეტის მოცულობა გაუქმების პერიოდისათვის მთლიანობაში განისაზღვრებოდა 33 მილიონ 319 ათასი ლარის მოცულობით. შვიდი საკრებულოს წევრიდან, რომლებმაც წარმოდგენილ ბიუჯეტს მხარი არ დაუჭირა, 5 „ნაციონალური მოძრაობის“ წარმომადგენელია, ხოლო ორი მათგანი - კახა მიქაია დემოუკიდებელი დეპუტატია, მალხაზ ჭეჟია კი „ქართული ოცნებიდანაა". დეპუატატმა კახა მიქაიამ ბიუჯეტის მიღებისას, გამგებელ ედიშერ თოლორაიას მისამართით განცხადება გააკეთა, სადაც განმარტა, თუ რატომ არ უჭერს ის მხარს წარმოდგენილ ბიუჯეტს. მისი განცხადებით, მან გამგეობიდან ვერ მიიღო დამაკმაყოფილილებელი პასუხი იმ შენიშვნებთან დაკავშირებით, რომელიც მას ბიუჯეტთან მიმართებაში ქონდა. ამასთან, საკრებულოს სხვა დეპუტატებსაც ჰქონდათ პრეტენზიები ბიუჯეტის მიმართებაში. დეპუტატების ნაწილის თქმით, ისინი არ იცნობენ წარმოდგენილ ბიუჯეტს , რადგან ის ელექტრონული ფოსტით  გუშინ მიიღეს. საკრებულოს თავმჯდომარე ლაშა გოგია, საკრებულოს დეპუტატების პრეტენზიებს არ იზიარებს და აცხადებს, რომ  წარმოდგენილი ბიუჯეტი განხილული იყო კომისიის სხდომებზე და ამასთან ის, გამოქვეყნებული იყო მუნიციპალიტეტის ოფიციალურ ვებ გვერდზე.