დღეს, ქალაქ ზუგდიდის საკრებულოს სხდომაზე კიდევ ერთი ფრაქციის - „ქართული ოცნება - რესპუბლიკელები“  შექმნის შესახებ გახდა ცნობილი. ფრაქციაში სამი დეპუტატია: თენგიზ ქოჩუა, ნიკოლოზ ზარქუა და საკრებულოს თავმჯდომარის მოადგილე გიორგი თოდუა. ახლადდაფუძნებულ ფრაქციას ნიკოლოზ ზარქუა უხელმძღვანელებს. ფრაქცის „ქართული ოცნება - რესპუბლიკელები“ შექმნას „ნაციონალური მოძრაობის“ დეპუტატის ანა წითლიძის მხრიდან, როგორც თვითონ აღნიშნა, „ნახევრად ხუმრობით“ ნათქვამი რეპლიკა მოჰყვა. მან გიორგი თოდუას მიმართა და უთხრა: „ქართული ოცნებიდან“ წარმოდგენილი ხართ სამი ფრაქცია და რადგან ერთი მიზნებისთვის იბრძვით, იქნებ გაერთიანებულ იყავით, ნაკლები დაუჯდებოდა ბიუჯეტს“. წითლიძის პასუხად გიორგი თოდუამ თქვა, რომ „კოალიციას გააჩნია საერთო მიზნები, თუმცა ფრაქციებს შორის განსხვავება არის, თუნდაც იდეოლოგიური თვალსაზრისით“. ქალაქ ზუგდიდის საკრებულოში ამ დროისთვის ოთხი ფრაქცია - “ქართული ოცნება – დემოკრატიული საქართველო” (თავმჯდომარე კარლო (გოგა) ღადუა) , “ქართული ოცნება – თავისუფალი დემოკრატები, კონსერვატორები”( თავმჯდომარე ლაშა ფარცვანია) „ქართული ოცნება - რესპუბლიკელები“ (თავმჯდომარე ნიკოლოზ ზარქუა) და “ერთიანი ნაციონალური მოძრაობა”(თავმჯდომარე ლევან კონჯარია) დარეგისტრირდა.