კოალიცია„ქართული ოცნების“ საკრებულოს დეპუტატები საქართველოს შინაგან საქმეთა მინისტრის მოადგილე ლევან იზორიას კოალიციის რაიონული ორგანიზაციის წინააღმდეგ ბრძოლაში სდებენ ბრალს.კოალიციის წევრები ამბობენ, რომ ჩხოროწყუში პოლიტიკურ ამინდს სწორედ ლევან იზორია ქმნის და ის საინიციატივო ჯგუფისა და „ნაციონალური მოძრაობის“ წევრებს ლობირებს. ბრიფინგზე,დღეს ვიდეო-მასალაც გაავრცელეს, რომელზეც იზორიას ბიძაშვილი და იმავდროულად საკრებულოს ქონების მართვის კომიტეტის თავმჯდომარის შვილი დავით იზორიაა ასახული, რომელიც კოალიციის ჩხოროწყუს შტაბში ცივი იარაღის გამოყენებით შტაბის წევრებს ყელის გამოჭრით ემუქრება. „დაპირისპირების მიზეზი ის გახდა, რომ არჩევნებამდე სამი დღით ადრე სოფელ კირცხში ამომრჩეველთან შეხვედრა გავმართეთ, სადაც იზორიების გვარი ცხოვრობს. დათო მოგვივარდა და არ დაგინახოთ მეორედ იქ ამოსულები, როგორ გაბედეთო და დანით გვემუქრებოდა“, - აცხადებს „ქართული ოცნება - დემოკრატიული საქართველოს“ ჩხოროწყუს რაიონული ორგანიზაციის თავმჯდომარე კორნელ წურწუმია. კაოლიციის წევრები პოლიტიკურ ხელმძღვანელობასთან შეხვედრას და სასწრაფო რეაგირებას ითხოვენ. ისინი აცხადებენ, რომ ვიდეო არჩევნებამდე სპეციალურად არ გაასაჯაროეს, რათა ვითარება არ დაძაბულიყო. ამასთან, მათი ინფორმაციით, დავით იზორია დააკავეს, თუმცა დანაშაულების ნიშნების არარსებობის მოტივით მეორე დღესვე გაათავისუფლეს.