ცისტური ფიბროზი აუტოსომურ-რეცესიული იშვიათი დაავადებაა, რომელიც ფილტვებს, პანკრეასს, ღვიძლსა და კუჭ-ნაწლავს ვნებს და სუნთქვის გართულებასა და ფილტვების ინფექციას იწვევს. მთავარი მიზეზი მე-7 ქრომოსომის გენში განვითარებული მუტაციაა. ცისტური ფიბროზის კლინიკურად გამოვლენის სიხშირეა 1/25000 ცოცხლადშობილ ახალშობილზე. ამ დაავადებას, რომელსაც არც თუ ისე ბევრი ადამიანი იცნობს, ჯგუფი One Republic-ი გამოეხმაურა და სიმღერაში “I Lived” ერთი ბიჭის ისტორიას მოგვიყვა. ბრაიანმა თავისი სიცოცხლის 15 წელი სწორედ ცისტურ ფიბროზთან ბრძოლაში გაატარა, მაგრამ, სიცოცხლის სიყვარულითა და ბრძოლის ჟინით, ბიჭუნამ შეძლო, ეს 15 წელი სავსე ყოფილიყო თავგადასავლებით, მიღწევებითა და იმ ყველაფრით, რაც საბოლოოდ ათქმევინებდა, რომ მან ნამდვილად იცოცხლა და იცხოვრა! სწორედ რომ სიცოცხლის სიყვარულსა და ჟინზეა დაწერილი სიმღერის ტექსტიც. მუსიკალური ვიდეო შეიქმნა იმისათვის, რომ ადამიანებმა უკეთ გაეცნონ დაავადების არსს და ფულადი სახსრებით დაეხმარონ ცისტური ფიბროზით დაავადებულებს. სიმღერა უკვე გაჟღერდა FOX-ის ახალ სერიალში “წითელზონარიანი საზოგადოება”, რომელიც საავადმყოფოში თინეიჯერების ცხოვრებას აღწერს. “წელს ბრაიანმა და მისმა გუნდმა 1200 მილი გაიარეს და ამით 300 000 დოლარი გადარიცხეს ცისტური ფიბროზის კვლევისათვის. თუ გსურთ, მეტი შეიტყოთ ამ დაავადების შესახებ და ჩაერთოთ ქველმოქმედებაში, ეწვიეთ ვებგვერდს www.CFF.org” – ასე მთავრდება One Republic-ის ახალი ნამუშევარი. როგორც ჩანს, სიმღერა და ვიდეო შემოდგომის ერთ-ერთი გამორჩეული ჰიტი გახდება…