„სამეგრელოს ხმის“ ლიდერი და ყოფილი პარლამენტარი თენგიზ ჯგუშია მის წინააღმდეგ აღძრული სისხლის სამართლის საქმის შეწყვეტას ითხოვს. ის საქართველოს მთავარ პროკურორს და ადგილობრივ და საერთაშორისო უფლებადამცველ ორგანიზაციებს მიმართავს და აცხადებს, რომ ის წარდგენილ ბრალდებაში უდანაშაულოა. “ბუნებრივია ვითხოვ საქმის შეწყვეტას და ასევე ვითხოვ, მიკერძოებული და ტენდენციური მიდგომებისგან გათავისუფლებას. ჩემს მიმართ მოხდა თავდასხმა და კანონიერი ტარების უფლების მქონე იარაღი გამოვიყენე გარდაუალი აუცილებლობიდან გამომდინარე“, - განაცხადა თენგიზ ჯგუშიამ  გამართულ საგანგებო ბრიფინგზე. შეგახსენებთ, რომ 2013 წლის 8 აგვისტოს სოფელ რიყეში ქალაქ ზუგდიდის საკრებულოს თავმჯდომარეს მერაბ ქვარაიასა და თენგიზ ჯგუშიას შორის ფიზიკური დაპირისპირება მოხდა, რომელიც კომბინატის დასახლებაში ჯგუშიას მხრიდან ტყვიის გასროლით დასრულდა. ჯგუშია წარდგენილ ბრალდებაში თავს უდანასაულოდ ცნობს და აცხადებს, რომ მან ტყვია ჰაერში, თავდაცვის მიზნით გაისროლა  და მას ქვარაიას მიმართულებით არ უსვრია. თენგიზ ჯგუშიას მიმართ ზუგდიდის რაიონული სასამართლო გადაწყვეტილებას, სავარაუდოდ,  17 ოქტომბერს გამოიტანს. ბრალის დამტკიცების შემთხვევაში ჯგუშიას 4-დან 7 წლამდე თავისუფლების აღკვეთა ემუქრება.