უკვე ცნობილია, თუ ვინ იქნება ოსკარის 87-ე დაჯილდოების ცერემონიალის წამყვანი. ეს ნილ პატრიკ ჰარისია, ცნობილი სატელევიზიო სერიალის "როგორ შევხვდი დედათქვენს" ერთ-ერთი მთავარი გმირი. ნილ პატრიკ ჰარისმა უჩვეულოდ გაგვაგებინა ახალი ამბავი. მსახიობმა ტვიტერზე ვიდეო დაპოსტა, სადაც ის ტელეფონზე საუბრობს და ამბობს "i am in", ანუ თანახმა ვარ. შემდეგ კი ავსებს სიას, თუ რა უნდა გააკეთოს გარდაცვალებამდე და წერს "წავიყვანო ოსკარი". ნილ პატრიკ ჰარისს დაჯილდოების ცერემონიალის წაყვანის კარგი გამოცდილება აქვს. ის უძღვებოდა "ემის" და "ტონის" ცერემონიალს, თანაც საკმაოდ მხიარულად და წარმატებით. ოსკარის 87-ე დაჯილდოება 2015 წლის 22 თებერვალს გაიმართება, ლოს ანჯელესში. პირდაპირ ეთერში წლის ყველაზე პოპულარულ კინოდაჯილდოებას 200 ქვეყნის ტელეარხი გადასცემს. რაც ეხება ნომინანტებს, 15 იანვარს გავიგებთ, თუ ვინ იბრძოლებს ოქროს კაცის მოპოვებისთვის 2015 წელს.