ოთარ იოსელიანი ახალ ფილმზე „ზამთრის სიმღერა" მუშაობს. ეს არის ქართულ-ფრანგული პროექტი, რომელსაც საქართველოს მხრიდან კომპანია „სტუდია 99" ახორციელებს. ფილმში გმირები სხვადასხვა დროში მოგზაურობენ, რეჟისორს კონკრეტული ისტორიული ეპოქა არ განუსაზღვრავს. გადაღებები ორი კვირაა საქართველოში მიმდინარეობს, შემდეგ კი რეჟისორი შემოქმედებით ჯგუფთან ერთად ფილმის სხვადასხვა სცენების გადასაღებად საფრანგეთში მიემგზავრება.საქართველოში გადასაღებ მოედნად გარდაბნის რაიონში არსებული ე.წ. „გამარჯვების" დასახლება შეირჩა, სადაც რამდენიმე შენობა სპეციალურად ფილმის შიდა გადაღებებისათვის აშენდა. პროექტისათვის სპეციალურად გამოიყო სამხედრო ტექნიკა და ქვეითთა ბატალიონი 80 კაციანი შემადგენლობით, ფილმში ჩაერთო საქართველოს თავდაცვის სამინისტროც, რომლის დახმარებითაც საომარი მოქმედებების ურთულესი სცენების გადაღება მოხერხდა. ფილმის პრემიერა 2015 წლის გაზაფხულზე საქართველოსა და საფრანგეთში ერთდოულად გაიმართება. ქართველ რეჟისორს, ოთარ იოსელიანს ბერლინის კინოფესტივალზე მოპოვებული აქვს „ვერცხლის დათვი", საფრანგეთში „ლუი დელუკის" პრესტიჟული ჯილდო, ასევე ნიუ-იორკის, ლონდონის, ტოკიოს ფესტივალების არაერთი ჯილდო თუ პრემია.