Google-მა წარმოადგინა ტექნოლოგია, რომელიც სპეციალური მაგნიტური ნანონაწილაკების მეშვეობით, ონკოლოგიური, გულ-სისხლძარღვთა და სხვა დაავადებების საწყის სტადიაზე დიაგნოსტირების საშუალებას იძლევა. ეს ნანონაწილაკები, პაციენტებმა აბების სახით უნდა მიიღონ. ნანონაწილაკები, რომლებიც „ათასჯერ ნაკლებია ერითროციტებზე “, სხვადასხვა გარსით დაიფარება და ამ ნაირსახეობის საფუძველზე მიემაგრება კიბოს უჯრედებს, სისხლს, ცხიმს, ან ცილის მოლეკულებს და სხვას. პაციენტის მაჯაზე დამაგრებული სპეციალური სამაჯური კი შეძლებს ნანონაწილაკების მაგნიტური ველის განსაზღვრას და შეაგროვებს ინფორმაციას მათ შეგროვებაზე და გადაადგილებაზე. ეს მონაცემები იქნება ბაზა სამედიცინო დიაგნოზის დასასმელად. მოლეკულურმა ბიოლოგმა ენდრიუ კონრადმა, რომელიც ხელმძღვანელობს პროექტს, რომელშიც Google X-ის 100-ზე მეტი თანამშრომელია ჩართული, განაცხადა, რომ მათი მთავარი ამოცანაა ავადმყოფობის განსაზღვრა რაც შეიძლება საწყის სტადიაზე. „ის, რითაც ჩვენ ვართ დაკავებული, წარმოადგენს პროაქტიულ მედიცინას. ტრადიციული მედიცინა კი რეაქტიულია“, - განაცხადა კონრადმა. პროექტის შემდგომი განვითარებისთვის, Google პარტნიორებს ეძებს. სტენფორდის უნივერსიტეტის მედიცინის სკოლის რადიოლოგიის კათედრის ხელმძღვანელის, სემ გემბირის განცხადებით, რომელიც ამ პროექტში Google-ს კონსულტაციებს უწევს, ტექნოლოგიურ კომპანიას დაახლოებით 5-7 წელი დასჭირდება ექიმებისგან ნანონაწილაკების გამოყენებაზე თანხმობის მისაღებად.