ზუგდიდში დადიანების ეზოში ისტორიულ-არქიტექტორული მუზეუმის წინ, ამავე მუზეუმის დამაარსებლის და მეცნიერის, აკაკი ჭანტურიას ძეგლი გაიხსნა. ძეგლის გახსნამდე კი ვლაქერნის ღვთისმშობლის სახელობის ტაძარში ამ დღესთან დაკავშირებით ზუგდიდისა და ცაიშის მიტროპოლიტმა მეუფე გერასიმემ სამღვდელოებასთან ერთად წირვა- ლოცვა აღევლინა. არქეოლოგისა და ეთნოგრაფის ძეგლის დადგმის  ავტორი და განმახორცილებელი „ჩოხოსანთა“ საზოგადოების ზუგდიდის სადროშოა. „ეს პროექტი შემოწირულობებითა და ჩვენი სახსრებით განვახორციელეთ. თანხა მხოლოდ ტექნიკურ სამუშაოებში დაგვეხარჯა. ძეგლის ავტორი „ჩოხოსანთა“ საზოგადოების ქუთაისის სადროშოს წარმომადგენელი მოქანდაკე გიორგი კიკვაძეა, რომელიც არაერთი მონუმენტის ავტორია. ის სრულიად უანგაროდ დაგვეხმარა. - აცხადებს „ჩოხოსანი“ გიორგი ქორთუა. ცნობისთვის, 1921 წლის 1 მაისს აკაკი ჭანტურიას თაოსნობით ზუგდიდში დადიანების სასახლის ბაზაზე გაიხსნა მუზეუმი, რომელსაც „სამეგრელოს მუზეუმი“ ეწოდა. მაშინ დადიანების ქონება ზუგდიდის გარდა სალხინოსა და ჭკადუაშში - პრინც მიურატის სასახლეში ინახებოდა. სალხინოდან მცველების თანხლებით აკაკი ჭანტურია დადიანების საგანძურს ურმებით ეზიდებოდა. 1937 წლიდან აკაკი ჭანტურიას დევნა დაიწყო, რის გამოც იძულებული გახდა 1940 წელს დადიანების სასახლიდან წასულიყო. მეცნიერმა მუზეუმი სამუდამოდ დატოვა, რის გამოც საგანძურის ნაწილი გაიძარცვა.