Facebook-ის დამფუძნებელმა და გენერალურმა დირექტორმა მარკ ცუკერბეგრმა, მისი სოციალური ქსელის მომხმარებლებს სთხოვა მისთვის 2015 წლისთვის მთავრი დიდი მიზანი განესაზღვრათ. ეს თხოვნა ცუკერბერგმა Facebook-ში თავის გვერდზე დაწერა. „ვაგროვებ იდეებს მომავალი წლის პირადი დიდი მიზნისთვის. ყოველ წელს, მე მიზანს ვსაზღვრავ, რაც თვალსაწიერის გაფართოებაში მეხმარება და რაღაც ახლის გაგებაში Facebook-ის მიღმა“, —დაწერა ცუკერბერგმა. წლის დიდი მიზენების დასახვა მარკ ცუკერბერგმა 2009 წლიდან დაიწყო და ყოველი მათგანი განსხვავებული იყო მასშტაბის და მიმართულების მიხედვით. მათ შორის იყო: სამსახურში ყოველდღიურად ჰალსტუხით სიარული; ჩინური ენის შესწავლა; მხოლოდ იმ ცხოველების ჭამა, რომლებიც თავად მოინადირა; ყოველდღიურად მადლიერების წერილების მიწერა იმ ადამიანებისთვის, რომლებმაც მსოფლიო უკეთესი გახადეს; ყოველდღიურად თითო ადამიანის გაცნობა Facebook-ის ფარგლებს გარეთ. ცუკერბერგმა დაწერა, რომ მას აქვს უკვე იდეა 2015 წლის მიზანთან დაკავშირებით, თუმცა გადაწყვეტილების მიღებამდე, Facebook-ის თანამეგობრობის აზრი აინტერესებს. გამოქვეყნებიდან ცოტა ხანში, ამ პუბლიკაციას 94 ათასი „მოწონება“ და 37 ათასი კომენტარი ჰქონდა. ზოგიერთ რჩევას ცუკერბეგმა პირადად უპასუხა - მათ შორის იყო ყოველთვიურად თითო წიგნის წაკითხვა, მუსულმანური დღესასწაულების აღნიშვნა, დღეში თითო მილის გარბენა, საჭმელების მომზადების ან ცეკვის შესწავლა.