ასოციაციამ "დეა“ და ორგანიზაციამ ,,სამეგრელოს ქალთა მოძრაობა“ სადისკუსიო შეხვედრა გამართა. შეხვედრის მიზანი ზუგდიდის მუნიციპალიტეტის 5 თემსა და ქალაქ ზუგდიდის 5 უბანში გამოვლენილი ქალთა და გოგონათა პრობლემების იდენტიფიკაციაა.  გზების და საბავშვო ბაღების რეაბილიტაცია, გაზიფიცირების, წყალმომარაგებისა და გამრიცხველიანების , ასევე ინტერნეტის ხელმიუწვდომლობა და გარე განათების პრობლემების მოგვარება, ეს ის ძირითადი საკითხებია, რაზეც დღევანდელ შეხვედრაზე  ზუგდიდის მუნიციპალიტეტის სხვადასხვა თემის წარმომადგენლებმა ისაუბრეს. ასოციაცია ,,დეას“ აღმასრულებელი დირექტორის მადონა ხარებავას განცხადებით, პრობლემის გამოვლენის შემდეგ პეტიცია მომზადდება, რომელიც შემდეგში ქალაქისა და მუნიციპალიტეტის საკრებულოს განსახილველად გადაეცემა. „იმედი გვაქვს,რომ გამოვლენილი პრობლემების შემდეგ დაწერილი პეტიცია აუცილებლად ყურადღებას მიიქცევს.  პეტიციის მომზადება მნიშვნელოვანია, რადგან თვითმმართველობის კანონში შედის ცვლილებები, რომელთა მიხედვით, საზოგადოების ჩართულობა ნებისმიერ პროცესში  უფრო აქტიური უნდა გახდეს,“- ამბობს მადონა ხარებავა. სადისკუსიო შეხვედრა ასოციაცია ,,დეას“ პროექტის ,,ქალების პოლიტიკური უფლებების დაცვის ხელშეწყობა’’ ფარგლებში ჩატარდა.  პროექტი მიმართულია ქალთა წარმომადგენლობის გაზრდისკენ ადგილობრივ თვითმმართველობაში და გენდერული თანასწორობის პრინციპების რეალიზაციისათვის საზოგადოების კონსოლიდაციისკენ.