დევნილთა ახალი კორპუსების მშენებლობის ადგილი სოზარ სუბარმა დაათვალიერა
ქალაქ ზუგდიდში, ბარამიას ქუჩა №7-ში, 34 თორმეტსართულიანი კორპუსის მშენებლობა დაიწყება, სადაც 2460 დევნილი ოჯახი ბინას საკუთრებაში მიიღებს.
ეს ინფორმაცია საქართველოს ოკუპირებული ტერიტორიებიდან იძულებით გადააგილებულ პირთა, განსახლებისა და ლტოლვილთა მინისტრმა სოზარ სუბარმა დევნილებს დღეს გამართულ შეხვედრაზე მიაწოდა. შეხვედრას მინისტრის მოადგილე მამუკა ცოტნიაშვილი, სამეგრელო-ზემო სვანეთის გუბერნატორი ლევან შონია, ქალაქ ზუგდიდის მუნიციპალიტეტის საკრებულოს თავმჯდომარე მერაბ ქვარაია, ზუგდიდის მუნიციპალიტეტის გამგებელი ედიშერ თოლორაია და აფხაზეთის ლეგიტიმური მთავრობის თავმჯდომარე ვახტანგ ყოლბაია დაესწრნენ.
არსებული ინფორმაციით ტერიტორიის განაშენიანება 3,5 ჰექტარზე მიმდინარეობს. აშენდება თანამედროვე არქიტექტურის კორპუსები, მოწესრიგდება ინფრასტრუქტურა. მინისტრის ინფორმაციით კომპლექსის აშენების შემდეგ "დევნილთა განსახლების გრძელვადიანი პრობლემა პრაქტიკულად მოიხსნება."
მისივე განცხადებით , ზუგდიდში თაბუკაშვილის ქუცაზე უკვე დასრულდა მშენებლობა და მარტის დასაწყისში 320 დევნილი ოჯახი ახალ ბინას მიიღბს . ახალი კორპუსი ადაპტირებულია შშმ პირებისთვის და პირველ სართულზე ბინებს სწორედ ეს ადამიანები მიიღებენ.
მხარის გუბერნატორის განცხადებით, მშენებლობაზე დევნილები დასაქმდებიან, რაც მნიშვნელოვნად ხელს შეუწყობს მათი სოციალური პირობების გაუმჯობესებას.
ქალაქ ზუგდიდის საკრებულოს თავმჯდომარემ დევნილებთან საუბრისას აღნიშნა, რომ, როგორც ცენტრალური, ასევე ადგილობრივი ხელისუფლების ერთ-ერთი პრიორიტეტია დევნილებისათვის ღირსეული პირობების შექმნა და ეს პროცესი შეუქცევადია.
მასალის გამოყენების პირობები