დღეს ზუგდიდში საზოგადოებრივი ორგანიზაციის „საუნჯე" პროექტის ,,თანაბარი მიდგომები თანაბარი შესაძლებლობებისათვის" ფარგლებში ფილმის პრეზენტაცია გაიმართა. შეხვედრას არასამთავრობო ორგანიზაციისა და მედიის წარმომადგენლები ესწრებოდნენ. დოკუმენტური ფილმი ორგანიზაციის სამ თვიანი მუშაობის პროცესს ასახავს, რომელიც პროექტის ფარგლებში განხორციელდა. „საუნჯეს“ ხელმძღვანელის იაგო ფასანძის განმარტებით, პროექტი - ,,თანაბარი მიდგომები თანაბარი შესაძლებლობებისათვის" მიზნად ისახავდა, ადგილობრივი თვითმმართველობის ორგანოებში დევნილთა უფლებების გათვალისწინებას. იაგო ფასანძე ამბობს, რომ ადგილობრივი ბიუჯეტით გათვალისწინებული სოციალური პაკეტები, თანაბრად უნდა ვრცელდებოდეს მუნიციპალიტეტში რეგისტრირებულ, როგორც ადგილობრივ ასევე, დევნილ მოსახლეობაზე. „ჩართულები ვიყავით ბიუჯეტის შედგენის პროცესში, როგორც ქალაქის, ასევე მუნიციპალიტეტის. მიდგომები არათანაბარი იყო. ქალაქის ბიუჯეტში გათვალისწინებული სოციალური მუხლები თანაბრად ვრცელდება ადგილობრივ და დევნილ მოსახლეობაზე, რასაც ვერ ვიტყვით ზუგდიდის მუნიციპალიტეტის ბიუჯეტზე. ჩვენი რეკომენდაციით, ადგილობრივი და დევნილი მოსახლეობის გამიჯვნა არ უნდა მოხდეს“, - თქვა იაგო ფასანძემ. პროექტი - ,,თანაბარი მიდგომები თანაბარი შესაძლებლობებისთვის" დიდი ბრიტანეთისა და ჩრდილოეთ ირლანდიის გაერთიანებული სამეფოს საგარეო და თანამეგობრობის ოფისის მხარდაჭერით ხორციელდება.