საქართველოს ტრანსპორტისა და მეგზევეების პროფკავშირის პრეზიდენტი და საჯარო მოხელეთა საკონკურსო-საატესტაციო კომისიის წევრი ლავრენტი ალანია ზუგდიდში მის მიმართ გამოთქმულ ბრალდებას გამოეხმაურა. ალანიას განცხადებით,მას კომისიის შემადგენლობაში ყოფნის სრული  უფლება ჰქონდა და ყოფილი კონკურსანტის,ქართლოს ჯობავას პრეტენზიას უადგილოდ მიიჩნევს. 17 მარტს, დემოკრატიული ჩართულობის ზუგდიდის ცენტრში,ხობის მკვიდრმა ქართლოს ჯობავამ ხობის მუნიციპალიტეტის საჯარო მოხელეთა საკონკურსო-საატესტაციო კომისია არაობიექტურობაში დაადანაშაულა. აქვე მან განაცხადა, რომ ტრანსპორტისა და მეგზევეების პროფკავშირის პრეზიდენტს ლავრენტი ალანიას, კანონის თანახმად, კომისიის წევრობის უფლება არ ჰქონდა. "ბატონი ქართლოს ჯობავა პროფესიით იურისტია და კარგად უნდა ჩაეხედა კანონში. როგორ შეიძლება იმის თქმა, რომ პროფკავშირის პრეზიდენტს კომისიის შემადგენლობაში ყოფნის უფლება არ ჰქონდა? დიახ, ვარ პრეზიდენტი, შესაბამისად, ვარ ამ პროფკავშირის წევრი და კომისიაში ყოფნის სრული უფლება მქონდა", - თქვა ლავრენტი ალანიამ. ცნობისთვის, კანონი საჯარო სამსახურის შესახებ და ასევე საქართველოს მთავრობის 2014 წლის 18 ივნისის განკარგულების მიხედვით, "კომისიის შემადგენლობაში მონაწილეობენ მოხელეთა პროფესიული კავშირების წევრები, დამოუკიდებელი სპეციალისტები (პირები, რომლებიც სამსახურებრივად არ არიან დაკავშირებულნი შესაბამის დაწესებულებასთან) და ასევე,შესაძლებელია მონაწილეობდნენ ადამიანური რესურსების მართვისათვის პასუხისმგებელი პირები".