ზუგდიდში გაეროს ქალთა ორგანიზაციის ინიციატივით  ქართველი, აფხაზი და ოსი მწერლების ერთობლივი  მოთხრობების კრებულის „პირველი ნაბიჯი“ პრეზენტაცია გაიმართა.  პრეზენტაციას კრებულში შესული ნაწარმოებების ავტორები ლაშა ბუღაძე, დათო ტურაშვილი და ეკატერინე ტოგონიძე ესწრებოდნენ. კრებულში გაერთიანებული 8 მოთხრობის მთავარ თემას ქალების როლი მშვიდობასა და უსაფრთხოებაში წარმოადგენს. კრებული „პირველი ნაბიჯი“ გაეროს ქალთა ორგანიზაციის ინიციატივით გამოიცა და მის გამოცემას წინ ქართველი, აფხაზი და ოსი მწერლების შეხვედრა უძღოდა, რომელიც გასული წლის ოქტომბერში, სტამბოლში შედგა. წიგნის პრეზენტაციას ზუგდიდში არასამთავრობო ორგანიზაციის წარმომადგენლები, მედია და ოკუპირებული აფხაზეთიდან გადმოსული მოსახლეობა დაესწრო. შეხვედრა დიალოგის რეჟიმში წარიმართა. პროექტი, ხალხთა შორის ნდობის აღდგენის ხელშეწყობას ისახავს მიზნად.  კრებულის პრეზენტაცია და საჯარო კითხვა ზუგდიდის შემდეგ საქართველოს რეგიონების სხვა ქალაქებში გაიმართება. პროექტი ევროკავშირის ხელშეწყობით, „ინოვაციური ინიციატივა გენდერული თანასწორობისთვის“ ფარგლებში განხორციელდა.