ფილმის „ინტერსტელარი“ ორიგინალური სცენარი ბედნიერ დასასრულს არ ითვალისწინებდა. როგორც გამომცემლობა Nerdist იტყობინება, ეს განცხადება პრეს-რელიზზე ჯონათან ნოლანმა გააკეთა. კითხვაზე – ზუსტად რა მოხდა ფინალში, მან უპასუხა: „თქვენ იმ ძმას არ ეკითხებით“. ჯონათან ნოლანის თქმით, მის მიერ მოფიქრებული დასასრული „უფრო მარტივი“ იყო. გმირი, რომლის როლსაც მეთიუ მაქკონაჰი ასრულებდა, მიემართება მორიგ შავ ხვრელში გარგანტუაში, მაგრამ ეს მოგზაურობაში მას უკან დასაბრუნებელი ბილეთი აღარ აქვს. კოსმიური ანომალიიდან მონაცემების გადაცემის შემდეგ, ეს ე.წ. „Wormhole“ ჩამოიშლება და არ უტოვებს მას უკან დაბრუნების არანაირ შანსს. ამგვარად, არ იქნებოდა არანაირი ტესერაქტები, დროით მანიპულაციები, ქალიშვილთან დაკონტაქტება და ქრისტოფერ ნოლანის მიერ მოფიქრებული მრავალი სხვა ეპიზოდი. ამ გზით, მაყურებელს შესთავაზებდნენ დიადი მიზნისთვის თავგანწირვის კლასიკურ ისტორიას, რომელშიც არ იქნებოდა მრავალგანზომილებიანი კუბები, რომლებიც უხილავი არსებების მიერ იყო შექმნილი. კონფერენციაზე დამსწრე კიპ ტორნის თქმით, ქრისტოფერ ნოლანმა სცენარი  შეცვალა. გრავიტაციულ ანომალიას, რომელმაც მთავარი გმირი და მისი ქალიშვილი NASA-ს გასაიდუმლოებულ ცენტრთან მიიყვანა, თავდაპირველ სცენარში უფრო მეცნიერული ახსნა უნდა ჰქონოდა. გრავიტაციული ტალღები უნდა წარმოშობილიყო ნეიტრონული ვარსკვლავის შავ ხვრელად გადაქცევის შედეგად და მზის სისტემაში „Wormhole“-ის მეშვეობით უნდა შემოეღწია. „ეს თეორია ჩემთვის ახლო და გასაგები იყო, მაგრამ ქრისმა ჩათვალა, რომ მაყურებელთათვის ის ზედმეტად „მეცნიერული“ იყო, – განაცხადა ტორნმა.