მძაფრსიუჟეტიან ფილმს „ფორსაჟი 7“ Universal-ისთვის არა მხოლოდ რეკორდული შემოსავალი მოაქვს, არამედ კატეგორიაში „საუკეთესო ფილმი“ ამერიკული კინოაკადემიის ჯილდოსაც დაიმსახურებს. როგორც Variety იტყობინება, ასეთი განცხადება გააკეთა მთავარი როლის შემსრულებელმა და სურათის პროდუსერმა ვინ დიზელმა. „ეს პროექტი მთავარ „ოსკარს“ მოიგებს. არაფერი ისეთი, რაც ამ პროექტის მასშტაბებთან ახლოს შეიძლება მოვიდეს“, – განაცხადა მან. დიზელის თქმით, ის რეზულტატით ძალიან კმაყოფილია და დარწმუნებულია, რომ ეს პოლ უოქერის ხსოვნისთვის პატივის მიგების ღირსეული საშუალებაა. „ჩვენ ყოველ ჯერზე ვამატებდით ახალ ილეთებსა და დინამიკას, მაგრამ ამჯერად ფილმი წარმოუდგენელი ემოციური ძალის მქონე გამოვიდა. ამას მსოფლიო ჩვენგან, ნამდვილად, არ მოელოდა“,- დაამატა მან. შეგახსენებთ, რომ ფილმში მონაწილეობას იღებდნენ დუეინ ჯონსონი, ჯეისონ სტეტჰემი, მიშელ როდრიგესი, ვინ დიზელი, პოლ უოქერი, კურტ რასელი, ჯორდანა ბრიუსტერი და სხვა მსახიობები. პოლ უოქერის გარდაცვალების შემდეგ მრავალ ეპიზოდში ის თავისმა ძმებმა ჩაანაცვლეს, ხოლო ზოგიერთ სცენაში მსახიობის კომპიუტერული ვერსია გამოიყენეს. სტუდია Universal არ გამორიცხავს, რომ „ფორსაჟი 7“-ის გამოსვლის შემდეგ კიდევ სამი სერია იქნეს გადაღებული.