საქართველოს კათალიკოს-პატრიარქის ილია მეორის ინიციატივითა და ლოცვა - კურთხევით, დასავლეთ საქართველოში ვაზის უძველესი ენდემური ჯიშების დარგვა-განაშენიანების აქცია გაიმართა. აქცია, რომელიც სამეგრელოში (ზუგდიდი), აჭარასა (ქედა) და გურიაში (ჯიხეთში) შედგა, ორგანიზატორებმა სიმბოლურად ლაზარეს შაბათს დაამთხვიეს. ვაზის ენდემური ჯიშების განაშენიანების აქციის ორგანიზატორები ზუგდიდში ჩოხოსანთა საზოგადოების წარმომადგენლები არიან. უძველესი მეგრული ვაზის ჯიშები,რომლებიც  ჩოხოსანთა საზოგადოების ხელმძღვანელმა გიორგი ქორთუამ მოიძია, სოფელ ნარაზენის ხარების ტაძარში, ყულიშკარის მამათა მონასტერში, კორცხელის დედათა მონასტერში და ასევე, ზუგდიდის საკათედრო ტაძრის ეზოში დაირგვება.  ვაზის ნერგები ნარაზენის ხარების ტაძრის წინამძღოლმა მამა ბესარიონ (ცინდელიანმა) აკურთხა. პარაკლისისა და ნერგების კურთხევის შემდეგ ვაზის თითო-თითო ნერგი მრევლსაც დაურიგდა. “სულ შვიდი ჯიშის ვაზი მოვიძიეთ. ესენია, მაჭყვადირა, კოლოში, ჭოდი, ჭვიტილური, ჩეჭიფეში, ჩექობალი… ნარაზენის ტაძრის ეზოში მაჭყვადირა, კოლოში, ჭოდი დაირგვება. დანარჩენი სხვადასხვა ტაძრებსა და კერძო ნაკვეთებში გადანაწილდება. მომავალში კიდევ ვგეგმავთ სხვა ჯიშების მოძიებას, გვინდა საკოლექციო ნაკვეთი გავაკეთოთ”, – თქვა გიორგი ქორთუამ. საპატრიარქოს მეღვინეობა-მევენახეობის სამეცნიერო კვლევითი ცენტრის კოორდინატორის გიორგი ანდრიაძის თქმით, დღევანდელი აქციის მიზანი საქართველოს სხვადასხვა კუთხეში უძველესი ენდემური ჯიშების მოძიება, გამრავლება და პოპულარიზაციაა. “ბოლო ათწლეულების განმავლობაში მხოლოდ კახურ ყურძენს მიექცა ყურადღება. ამით თითქოსდა დაიჩრდილა სხვა კუთხეების მეღვინეობა- მევენახეობის ტრადიციები. აქედან გამომდინარე , ჩვენი მიზანია აღვადგინოთ ძველი ტრადიციები”, – აღნიშნა რადიო “ათინათთან” საუბარში გიორგი ანდრიაძემ. საქართველოს კათალიკოს-პატრიარქის ილია მეორის ინიციატივითა და ლოცვა- კურთხევით, 2014 წლის 13 მაისს მეღვინეობა-მევენახეობის სამეცნიერო კვლევითი ცენტრი დაარსდა, რომლის მიზანია ქართული ვენახის მეცნიერული კუთხით შესწავლა და პოპულარიზაცია.