ქალაქ ზუგდიდის მუნიციპალიტეტის ტერიტორიაზე რეგისტრირებულ მოქალაქეებს, (ადგილობრივი და დევნილი) დღეიდან ძვირადღირებული მედიკამენტების შეძენა და სამედიცინო დიაგნოსტიკა სრულად დაუფინანსდებათ.  ბენეფიციარები დაფინანსებას ადგილობრივი ბიუჯეტიდან მიიღებენ.  აქამდე, აღნიშნული პროგრამის მიხედვით, ბენეფიციარები 50 - 70% - ით ფინანსდებოდნენ. პროგრამა ვრცელდება ქალაქ ზუგდიდის მუნიციპალიტეტის ტერიტორიაზე რეგისტრირებულ ადგილობრივ და დევნილ მოქალაქეებზე იმ შემთხვევაში, თუ სამედიცინო დაზღვევის პაკეტში არ შედის მათთვის საჭირო სამედიცინო მომსახურება და ძვირადღირებული მედიკამენტების შეძენა, ასევე თუ აღნიშნულ სერვისებს არ ითვალისწინებს საყოველთაო სადაზღვევო მომსახურება. ძვირადღირებული მედიკამენტები (50.00 ლარის ზევით) 500.00 ლარამდე, დაფინანსდება წელიწადში ერთხელ, ხოლო რაც შეეხება დიაგნოსტიკას (ტომოგრაფია, კორონაროგრაფია), ბენეფიციარი დაფინანსებას ასევე წელიწადში ერთხელ მიიღებს და ამ შემთხვევაშიც, ლიმიტი - 500 ლარია.