დიდ ბრიტანეთში აუქციონზე გაიყიდა შეზლონგი, რომელიც 1912 წელს ჩაძირულ სამგზავრო ლაინერ „ტიტანიკს“ ეკუთვნოდა. როგორც The Guardian-ი იტყობინება, ლოტი 100 350 ფუნტად კერძო კოლექციონერმა შეიძინა. ტრაგედიამდე ხის შეზლონგი პირველი კლასის სასეირნო გემბანზე იდგა. აუქციონის სახლის Henry Aldridge & Son-ის წარმომადგენელმა ენდრიუ ოლირჯმა ნივთის ახალი მფლობელის ვინაობა არ დაასახელა. ნივთი შვიდი შეზლონგიდან ერთ-ერთია, რომელიც გემის Mackay-Bennett-ის გუნდის წევრებმა „ტიტანიკის“ დაღუპვის ადგილას აღმოაჩინეს და ცხედრების ამოყვანისთვის გამოიყენეს. სავარაუდოდ ხის სავარძელი თავდაპირველად Mackay-Bennett-ის ეკიპაჟის ერთ-ერთი წევრთან ინახებოდა. ბოლო 15 წლის განმავლობაში მისი მფლობელი იყო ბრიტანელი კოლექციონერი. ის მასზე არასდროს დამჯდარა, შეზლონგს მხოლოდ ინტერიერისთვის იყენებდა. იანვარში ბოსტონის აუქციონზე „ტიტანიკის“ ერთ-ერთი გადარჩენილი მგზავრის წერილი 11 875 დოლარად გაიყიდა. 2014 წლის ოქტომბერში კი აუქციონზე წარმოდგენილი მენიუ პირველი კლასის მგზავრებისთვის 96, 5 ათას დოლარად შეიძინეს. ბრიტანული ტრანსატლანტიკური ლაინერი „ტიტანიკი“ პირველივე რეისის შესრულებისას 1912 წლის 14 აპრილს აისბერგთან შეჯახების შედეგად ჩაიძირა. 1496 მგზავრიდან მხოლოდ 712 ადამიანის გადარჩენა მოხერხდა.