დღეს ხობის საკრებულოს დარბაზში ასოციაცია „ათინათის“ წარმომადგენლებმა პროექტის „საზოგადოების ცოდნის გაძლიერება და საზოგადოებრივი ორგანიზაციების ჩართულობა რეგიონულ დაგეგმარებაში“ ფარგლებში შეხვედრა გამართეს. მას მოქალაქეები, ადგილობრივი ხელისუფლების, ბიზნეს სექტორისა და საჯარო სკოლების წარმომადგენლები დაესწრნენ. შეხვედრაზე მუნიციპალიტეტში დაგეგმილ ინფრასტრუქტურულ პროექტებსა და არსებულ პრობლემებზე ისაუბრეს. აქვე მონაწილეებმა შეავსეს კითხვარები, რომლებშიც ყველაზე მნიშვნელოვანი პრობლემები აღწერეს.  მათ შორის გამოიკვეთა საჯარო სკოლების კეთილმოწყობა, გაზიფიცირება, შიდა გზების მოწესრიგება და სხვა. სამოქალაქო საზოგადოებრივი ორგანიზაციების რეგიონული ქსელი (RCS-N) აერთიანებს 50-მდე ორგანიზაციას და ორ წელზე მეტია მოქმედებს. საქართველოს ყველა რეგიონში, ადგილობრივი საჭიროებების გამოვლენისა და მათი ადვოკატირების მიმართულებით, ქსელმა მისი დამფუძნებელი ორგანიზაციის „სიდა“ ფასილიტაციით 2014 წლის დეკემბრიდან დაიწყო ახალი პროექტის „საზოგადოების ცოდნის გაძლიერება და საზოგადოებრივი ორგანიზაციების ჩართულობა რეგიონულ დაგეგმარებაში“ განხორციელება. პროექტის მიზანია რეგიონული და ადგილობრივი განვითარების პროცესებში მოქალაქეთა ჩართულობის გაძლიერება. პროექტს სამეგრელო-ზემო სვანეთის მხარეში ასოციაცია „ათინათი“ ახორციელებს.